Category Archives: විද්‍යා

ජිඔඩානෝ බෘනෝ පුළුස්සා මරා දැමීම (Burning of Giordano Bruno)

විද්‍යාත්මක ක්‍රමය සැකසී ඇත්තේ යම් මතයන් නිවැරදි හෝ වැරදි බව තහවුරු කිරීමට අවශ්‍ය දත්ත එකතුකිරීම සඳහාය. මෙහිදී අවසාන නිගමයකට පැමිණ එය තහවුරු කිරීමක් සිදුනොවන අතර, දත්ත මගින් තහවුරුවනදැ මත තවත් පර්යේෂණ සඳහා හෝ නිගමනය පිළිගැනීම සිදුවේ. දත්ත මගින් හෙළිවෙනදේ පිළිගැනීමත්, සියලූම දේ ප්‍රශ්නකිරීමත් (question everything) විද්‍යාත්මක ක්‍රමයේ ප්‍රධාන අංගයන්වේ.

මිනිස් අතීතයේ අදහස් පළකිරීම බොහෝ විටෙක ආගම් විසින් පාලනය කර ඇත. ජිඔඩානෝ බෘනෝ (1548 – 1600) එයට හොඳම නිදසුනකි. අපගේ සුර්ය්‍යා විශ්වයේ එක තරුවක් බවත් විශ්වය එවැනි සුර්ය්‍යන් විශාල සංඛ්‍යාවකින් තැනී ඇති බවත් එම සුර්ය්‍යන් වටා අපගේ පෘථිවියවැනි ග්‍රහලෝක සංක්‍රමනයවන බවත් ඔහු කියා සිටියේය. මෙම අදහස එවකට පැවති පෘථිවිය කෙන්ද්‍රකරගත් මතයට විරුද්ධවූ බැවින් සිරගත්වීමටත් පසුව ශුද්ධවූ ත්‍රිත්වයට සහ ක්‍රිස්තුස්වහන්සේට විරුද්ධවීමේ වරදට සහ අනිකුත් ඒහා සම්බන්ධ වැරදිමාලවකට වැරදිකරු කොට පුළුස්සා මරාදැමීමටත් ලක්විය.

විද්‍යාත්මක ක්‍රමයට අනුව බෘනෝට ඔහුගේ අදහස තහවුරුකිරීමට දත්ත තිබුණේ නැත. එමෙන්ම අදහස පළකළ මොහොතේසිටම විවිධාකාර වධහිංසාවලට ලක්වීම, සිරගතවීම ආදී හේතූන්මත දත්ත ‍රැස්කිරීම සඳහා පර්යේෂණකිරීමට හැකියාවක්ද නොලැබිණි. එනමුදු ඔහුගේ මරණයෙන් වසර දහයකට පසු ගැලීලියෝ විසින් දුරදක්නයක් හරහා කරනලද නිරීක්ෂණ බෘනෝගේ මතය තහවුරුකරන ලදී. ගැලීලියෝ මුහුණදුන් ඉරණමද අප කවුරුත් හොඳින් දන්නා දෙයකි.

අපේ රටේ විද්‍යාව විද්‍යාත්මක ක්‍රමයේ බැහැරවගිය අවස්ථා ඉතා මෑත අතීතයේදි අපට අසන්නට ලැබීඇත. නාථ දෙවියන් කිවූ අයුරින් සහල්වල ආසනික් තිබේයැයි නිගමනය කිරීම, අවසාන නිගමනයකට එලැබී එය තහවුරුකිරීමට කරනලද පර්යේෂණවේ. එය දත්තයන් මතින් නිගමනයකට එලැබීමක් නෙවේ. එසේම දැනට පවතින වාතාවරණය තුළ කිරිවෙහෙරින් පෙරුණේ කුමක්දයි ඇසීමත්, එය පර්යේෂණයකට ලක්කිරීමට ඉල්ලීමත් පුළුස්සා මරාදැමීමට හේතුවන කරුණුවිය හැක. කිරිවෙහෙරින් සිදුවූයේ ආශ්චර්‍යක්නම් එය කතරගමවැනි නගරයක ඊට දින කිහිපයකට ඉහතදී මිනිසුන් වෙඩිතබා මරාදමන පවුකාරකම් සිදුවූ භූමියක සිදුවූයේ ඇයි?

Advertisements

එක් ප්‍රතිචාරයක්

Filed under ආගමික, විද්‍යා, සමාජීය, සිංහල

කිරි සහ කැකිරි

පානීය ජලය ඉල්ලා උද්ඝෝෂණකල ජනතාවට වෙඩිතබා මරාදැමීම ඡන්දයක් ළඟ එනවිට නොකළයුතු දෙයකි. එනිසාවෙන් ඇතිවූ ජනතා කම්පනය අමතකකිරීමට ඔවුන්ව ඊළඟ මාතෘකාවට යොමුකළ යුතුව ඇත. නිකම් මාතෘකාවකින් එය කළනොහැක. බඩට සහ හිතට එකවර පහරදියයුතුය. මුස්ලිම් ව්‍යාපරිකයින් මෙරටට ගෙන්වන කිරිවල වසවිස තිබීම එවැන්නකි.

මෙම කථාවේ විශාල අඩුලුහුඬුකම් ඇත. එමනිසාවෙන් මෙය තේරුම්ගැනීමට මට නොහැක. පහත සඳහන් කරුණු කිසිම පිළිවෙළක් නැතිව මා සිතට නැගුණුදෑය.

මාගේ මුහුණුපොතේ පහත ස්ටේටස් අප්ඩේට් දැමූවෙමි.:

Status 1:
නවසීලන්තයේ හරක් තණකොළ කනවිට ඒවායේ ඇති විෂ රසායන උන්ගේ ශරීරය හරහා උන්ගේ කිරිවලටද ඉන් අනතුරුව කිරිපිටිවලට යන මුත්, කිසිම පාලනයක් නොමැතිව කෘෂිරසායන පාවිච්චිකරන ලංකාවේ හරකුන්ගේ ශරීරය හරහා ලංකාවේ නිපදවන කිරිර්පිටිවලට විසරසායන ඇතුළු නොවන හේතුව කුමක්ද? (පිළිතුර ඊළඟ ස්ටේටස් අප්ඩේඑකෙන් බලාපොරොත්තුවන්න)
Status 2:
කාර්මික තාක්ෂණ ආයතනය (අයි.ටී.අයි.) තාක්ෂණ සහ පර්යේෂණ අමාත්‍යාංශය යටතේ ක්‍රියාත්මකවන ආයතනයකි. අලුත් තාක්ෂණ සහ පර්යේෂණ ඇමතිතුමා ජාතික හෙල උරුමයේ නායකතුමාය. එතුමාගේ පක්ෂයේ ලොකු කකුලක් කාර්මික තාක්ෂණ ආයතයේ නව සභාපතිතුමලෙස පත්වී සති දෙකකි. කාර්මික තාක්ෂණික ආයතනයට අනුව කිරිවල ඩී.සී.ඩී. ප්‍රමාණය තීරණය කිරීමට හයි පර්ෆොර්මන්ස් ළිකුයිඩ් ක්‍රොමැටොග්‍රැ‍ෆි (එච්.පී.එල්.සී) පාවිච්චිකර ඇත. එච්.පී.එල්.සී. සංඝටක වෙන්කර ගැනීමට පාවිච්චිකරන උපකරණයකි. එහි සංඝටක අඳුනාගැනීමේ හැකියාව පාවිච්චිකරන ලද ඩිටෙක්ටරය මත රඳා පවතී. එච්.පී.එල්.සී. භාවිතයෙන් සංඝටක පැහැදිලිව වෙන්කරගැනීම මතද ඩී.සී.ඩී. ප්‍රමාණයේ නිරවද්‍යතාවය රඳාපවතී. හාල්වල ආසනික් නැතිබව කීවේද කාර්මික තාක්ෂණ ආයතනයයි. හෙල උරුමයට අනුව හාල්වල ආසනික් ඇත. එසේනම් පිදුරුකන අපේ වැස්සියන්ගේ කිරිවල ආසනික් ඇතැයිකියා කාර්මික තාක්ෂණ ආයතනය දැන් කියයිද?
——
අඹෙවෙල කිරි සමාගමේ වෙබ් අඩවියට අනුව ඔවුන් කිරි ලීටර් මිලියන 2ක් දක්වා කිරිපිටිකිරීමට ඉලක්කයක් ඇත. නවසීලන්ත කිරි එලෙදෙනෙකු දිනකට කිරි ලීටර් 17ක් පමණ නිෂ්පාදනය කරයි. ඒ සඳහා තන්කොළ කිලෝ ග්‍රැම් 17ක් සහ වතුර ලීටර 50ක් පමණ පරිභෝජනය කරනුලැබේ. ලංකාවේ කිරි එළදෙනුන් සඳහ එම ඉලක්කම් මම නොදනිමි. තණකොළ වැවීමට මාස 3ක් අවශ්‍යය. මේ සියලු දත්ත සලකා බැලුකල ලංකාවට අවශ්‍ය කිරි ප්‍රමාණය නිපදවීමට එළදෙනුන් සහ තෘනභූමි අපට ඇතැයිද මම නොදනිමි.

නවසීලන්ත හරකුන්ගේ සහ ලාංකීය හරකුන්ගේ ජෛව රසායනය මහා විශාලවෙනස්කමක් නොමැත. ලංකාවේ ඩී.සී.ඩී. නොයොදනා බැවින් එය අපේ කිරිවල නැත. එනිසාවෙන් අපේ කිරිවල කිසිම අපද්‍රව්‍යක් නොමැතිලෙස හැසිරීම විද්‍යාත්මක හැසිරීමක් නොව දේශපාලනික හැසිරීමකි. කවදාත් සුපුරුදු දේශපාලඟයින්ට කිරි ජනතාවට කැකිරි මෙතනදීද ලැබීඇති බව පැහැදිලිය

එක් ප්‍රතිචාරයක්

Filed under දේශපාලනික, රසායනික, විද්‍යා, ශ්‍රි ලංකා රාජ්‍ය සේවය, සමාජීය, සිංහල, සෞඛ්‍ය

AIDS මාරන්තිකයි – මැකුවොත් හිරේ

මාතෘකාව උපුටා ගත්තේ 1993 වසරේ පේරාදෙණිය විශ්ව විද්‍යාලයේ පළමු වසරේ විද්‍යා සිසුවෙකුගේ අතේ තිබු ෆයිල් කවරයකිනි.

දෙසැම්බර් පළමුවැනිදා ලෝක ඒඩ්ස් දිනයයි. ඒඩ්ස්ගැන අහඹුලෙස ‍තෝරාගත් දත්තයන්, සබැඳියාවන් සහ විඩියෝ කිහිපයක් සටහන් කරමි.

ඔබටද හැකිතාක් ඒඩ්ස්ගැන දැනුවත්කිරීම, සහයෝගයදීම සහ වලක්වාගැනීම කිරීමට උත්සාහකරනු ඇතැයි බලාපොරොත්තුවෙමි.

ඒඩ්ස් යනු – Acquired Immune Deficiency Syndrome – නතුකරගත් ප්‍රතිශක්ති ඌනතා සහසාධකය

ඒඩ්ස්ගැන වැරදි මතවාදගැන මෙතැනින් කියවිය හැක. – http://en.wikipedia.org/wiki/HIV_and_AIDS_misconceptions

සිංහල විකිපීඩියාවේ ඒඩ්ස් ගැන පි‍ටුව – http://si.wikipedia.org/wiki/ඒඩ්ස්

එම පි‍ටුවට අනුව ඒඩ්ස් රෝගියෙකුට ඇති අයිතිවාසිකම්

  • ජිවත් විමට ඇති අයිතිවාසිකම.
  • නීතීය ඉදිරියේ සමාන ආරක්‍ෂාව හා වෙනසකට භාඡනය නොවිමේ අයිතිවාසිකම.
  • නිදහස හා පුද්ගලයකුගේ ආරක්‍ෂාව.
  • නිදහසේ ගමන් කිරිමට ඇති අයිතිවාසිකම.
  • රහස්‍යය භාවය පිළිබද අයිතිවාසිකම.
  • වැඩ කිරිමට ඇති අයිතිවාසිකම.
  • විවාහ විමට හා විවාහ ජිවිතයක් ගත කිරිමට ඇති අයිතිවාසිකම.
  • ආශ්‍රය කිරිමට ඇති අයිතිවාසිකම.
  • අධ්‍යාපනයට ඇති අයිතිවාසිකම.
  • ප්‍රමානවත් ජිවන තත්වයක් ගත කිරිමට ඇති අයිතිවාසිකම.
  • සමාජ ආරක්‍ෂාව ,පහසුකම් සහ සුබ සාධනයන් සදහා ඇති අයිතිවාසිකම.
  • විද්‍යාත්මක වර්ධනයන් සහ එහි වාසිය බෙදා ගැනිමට ඇති අයිතිවාසිකම.
  • පොදු සංස්කෘතික ජිවිතයකට අනුගතවිමේ අයිතිවාසිකම.
  • වධහිංසාව ,කෲර අමානුෂික සහ අවමන් සහගත සැලකිලි වලින් නිදහස් විම සහ දඬුවම් වලින් තොරවිමේ අයිතිවාසිකම.

දෙසැම්බර් පළමුවැනිදා දිනමිණ පත්තරයේ ඒඩ්ස්ගැන මෙසේ සඳහන්ව තිබිණි – http://www.dinamina.lk/2010/12/01/_art.asp?fn=n1012015

ලෝක ඒඩ්ස් දත්තයන් මෙතැනින් ලබාගත හැකිය. – http://www.avert.org/worldstats.htm

ලංකාවේ ඒඩ්ස්ගැන සිංහලෙන් කෙරුණු සාකච්ඡාවක් මෙතැනින් දැකිය හැක.

අමතර තවත් විඩියෝ

මෙම පහතින් ඇති පලවෙනි විඩියෝව ඉතාමත් හොඳයැයි මට සිතිනි.

ප්‍රතිචාරයක් ලබාදෙන්න

Filed under අධ්‍යාපනය, විද්‍යා, සමාජීය, සිංහල, සෞඛ්‍ය

දාගැබ් මහ වැව් බැන්දේ ඒලියන්ස්ලාය පුතේ

1990 ගණන්වලදී අපේ ආර්ථිකය මංසන්ධියක් පසු කළායැයි මට සිතේ. එතෙක් කෘෂිකාර්මික ආර්ථිකයක්ව තිබු ශ්‍රි ලංකාව සේවා ආර්ථිකයක් බවට පත්වීම 90 දශකයේදී සිදුවිය. ඇඟලුම් කර්මාන්තයේ නිෂ්පාදන අපේ රට තුළ ප්‍රධාන අපනයනය බවට පත්විණි. ලංකාවේ සිට ඇමරිකාවට පැමිණ දෙවැනි දිනයේදීම පොත් බැගයක් ගැනීමට ‍ටුසොන් නගරයේ වොල්මාර්ට් එකෙදී මගේ සිතගත් බැගය නිෂ්පාදනය කර තිබුණේ ශ්‍රි ලංකාවෙදී බව දු‍ටු මගේ ඇ‍ඟෙහි හිරිගඩු පිපිණි. ඒ මා සිතතුළ ඇතිවූ යම් ආඩම්බරකමටයැයි මට සිතේ. එතැන් පටන් ඇදුම් කඩයකට ගොඩවෙන හැමවිටම විවිධාකාර ඇඳුම් මසා ඇත්තේ ලංකාවේද යන්න සොයා බලන්නට මම අමතක නොකළෙමි. ඒම ලේබල් දු‍ටුවිට සිතෙහි යම් දුකක්ද ඇතිවූයේ සන්නාලියන්ගේ දුක්ගැන මා යම් දුරකට දැන සිටි බැවිනි. මගේ නැදෑවන අක්කලා කිහිපදෙනෙක්ම ඇඟලුම් කර්මාන්තයේ නියැලී සිටි අයය.

ජනාධිපතිව සිටිකාලයේදී ආර්. ප්‍රේමදාස මහතා කෙරෙහි මාගේ සිතේ පැහැදීමක් නොතිබිණි. නමුත් නැවත හැරී බලන විට මගේ ජීවිතකාලය තුළ සිටි නායකයින් අතරින් රාමුවට පිටතින් සිතූ එකම නායකයා ඔහුයැයි මට සිතේ. ඒතැන් පටන් සිටි හැම නායකයාම ඔහුගේ ආකෘතිය විවිධාකාර නම් යොදා පාවිච්චිකරන අයුරු පෙනේ. පරණ රාමුවෙන් පිටතට පැමිණි නව නායකයින් ප්‍රේමදාස රාමුවේ හිරවී ඇත.

ඕනැම කර්මාන්තයක් වැඩි ලාභ තකා පිරිවැය අඩුකර ගැනීමට ලාභදායි කම්කරුවන් සොයායැම නිතර අසන්නට ලැබෙන දෙයකි. එය දැන් අපේ ඇඟලුම් කර්මාණතයට සිදුවන්නේ අසල්වැසි බංගලාදේශය වැනි රටවලින් ලාභ ශ්‍රමය සොයා ගත හැකි බැවිනි. ඇගලුම් කර්මාන්තය තුළ විශාලලෙස ‍රැකියා කපාහැරීම් පසුගිය වසර කිහිපය තුළ සිදුවී ඇති බව පාර්ලිමේන්තුවතුළදීම පසුගිය දිනක කථාවිනි.

කෙසේවෙතත් අපි දැන් සංචාරක කර්මාන්තයට සූදානම් වෙමින් සිටියි. නගර අලංකාරය සහ කැසීනෝ ව්‍යාපාරය දියුණුකිරීම පටන් ගෙන ඇත. සංචාරක කර්මාන්තය යනු සංකීර්ණ කර්මාන්තයකි. එයට දේශීය මෙන්ම විදේශිකයන්ද, හුදු විනෝදය තකා මෙන්ම අධ්‍යාපනය තකා සැරි සරන්නෝද අයත්වෙති. අපේ රට සැරසෙන්නේ මින් එක කොටසකට පමණක්යැයි මට සිතේ. එම කොටස දැනට තායිලන්තයට සිදුකර ඇති දේ අපේ රටට සිදු කරන්නට වැඩිකල් ගත නොවනු ඇත. රටේ වැඩිදෙනෙකු වෙළඳපොළ මත සියල්ල තීරණය විය යුතුය යන මතයේ සිටිති. සමහරක් දැ එසේ විය යුතුවුවද සමහරක් දැ එසේ නොවිය යුතුය. එය වෙනත් මාතෘකාවකි.

මේ දිනවල කඩුල්ල බැලූවිට මා ඉතාමත් ආශාවෙන් ගිය තැනක්වන පොළොන්නරුවෙහි පින්තූර දක්නට ලැබේ. ඒවා දු‍ටු මා අතීතයේ අතරමං විණි. අපගේ මුතුන් මිත්තන් මෙවැනි නිර්මාණ කරන්නට ඇත්තේ කිහිපවතාවක් සාදා කඩා බිඳදමා නැවත ගොඩනැගීමෙන් විය නොහැක. වාරිමාර්ග ව්‍යාපෘති, කළා කෘති, දැවැන්ත පිළිම සහ ගොඩනැගිලි සාර්ථක ලෙස ඉඳිකීරීමට, ඒවා සැලසුම් කිරීමට සහ වහල් සේවය යොදවා හෝ ඒවා ගොඩනැගීමට නායකත්වක්දීමට හැකි මිනිසුන් (හෝ පිට සක්වලින් පැමිණයියයන්) අපේ රටෙහි සිට ඇත.

එවැනි මිනිසුන් සිටිනවායැයි විශ්වාසය තිබු නායකයින් විශාල ව්‍යාපෘතිවලට අනුබල දී ඇත. අද අපට එවැනි නායකයින් නොමැත. අද මහා ව්‍යාපෘතිවලය චීන සැලසුම්කරුවන්, ඉන්ජිනේරුවන්, කම්කරුවන් පැමිණේ. රුසියාවෙන් පැමිණ තෙල් හාරනු ලැබේ. රටේ ඇති මිනිරන්වැනි ස්වාභවික සම්පත් හාරා කැබලිකොට පිටරටට විකිනනු ලැබේ.

ග්‍රැෆීන්

ග්‍රැෆයිට් සහ කාබන් නැනෝ ටියුබ්ස්

මිනිරන් (ඉංග්‍රිසියෙන් ග්‍රැෆයිට්) සෑදී ඇත්තේ මෙවර භෞතික විද්‍යාව සඳහා නොබෙල් ත්‍යාගයෙන් පිදුම්ලද ග්‍රැෆීන් නම් රසායනික ද්‍රව්‍යයේ ස්තර එකමත එක තබා තැනෙන ත්‍රිමාණ ආකෘතියකිනි. වෙනත් වචනවලින් කියතොත්, මිනිරන්වලින් ග්‍රැෆීන් ස්තර වෙන්කළ හැක. ග්‍රැෆීන් රෝල්කර කාබන් නැනෝටියුබ්ස්ද, ග්‍රැෆීන් ගුලිකර ෆුලරීන්ද (බකියි බෝල්ස්ද) තැනිය හැක. මා මෙහි ලියා ඇතිපරිදි එය ලෙහෙසියෙන් කළනොහැකිවුවද ඒවා කිරීමට හැකියාව ඇති ශ්‍රි ලාංකිකයින් ඇත. වසර කිහිපයකට ඉහතදී කරනලද සමීක්ෂණයකින් 2009 වසරේදී ඩොලර් මිලියන 200ක්වන කාබන් නැනෝටියුබ් සඳහා ඇති ඉල්ලුම 2020දී ඩොලර් බිලියන 9ත් පසුකර යන බව කියැවේ. නමුත් එවැනිදේ අපගේ වෙළඳපොළ පඬිවරුන්හට පෙනෙන්නේ නැත. ඔවුනට අනුව ඇමෙරිකාව වැනි බටහිර රටවලින් ශ්‍රි ලාංකිකයින් නැවත පැමිණෙන්නේ ඇමෙරිකානු ආර්ථිකය කඩාවැටී ඔවුනට රක්ෂා නැතිවීම නිසාය.

පසුගිය වසර 15තුළ විද්‍යා උපාධිධාරීන් 30000ක්වත් අඩුම තරමින් අප රටෙහි බිහිවී ඇත. ඔවුනව මෙවැනි කර්මාන්තයකට යොමුකරගැනීමට අපහසුතාවයක් නැත. අපගේ විශ්ව විද්‍යාල තුළ විෂය නිර්දේශය “අලුත් වෙළඳපොළට හැඩගැසිය යුතුය”යන මතය දරනා පඬිවරුන්හට මේ දේය කිවහැකිය. ග්‍රැෆයිට් සහ දියමන්තිගැන ඉගෙනගෙන ඇත්නම් (සාමාන්‍යයෙන් උසස්පෙළට සහ විද්‍යා උපාධියේ පළමු වසරතුළදී මෙය ඉගෙන ගනු ලැබේ) ඉතිරිය තේරුම් ගැනීම අපහසුනොවේ. විශ්ව විද්‍යාලයක් යනු කුඩා දරුවන්හට හෝ හැට පැන්න නාකීන්හට කුක්කු පොවන තනපටක් නොවේ. විද්‍යා උපාධියක් හරිහැටි හදාරා ඇමරිකාවට, එංගලන්තයට, සහ අනෙකුත් රටවල් විශාල ගණනකට පැමිණ පශ්චාත් උපාධි හැදැරීමේ හැකියාවක් ඇත්නම් ලංකාවේ විශ්වවිද්‍යාලයෙන් ඔබහට සිදුවිය යුතු සේවාව ඉ‍ටුවී ඇත. විෂය නිර්දේශ වෙනස්විය යුතුනැත යන්න මින් අදහස් නොකරමි. වෙනස්විය යුත්තේ විශ්වවිද්‍යාලයට නොගිය නමුත් විශ්ව විද්‍යාල පාගාදමන්නට තැත්කරන්නන්ගේ උවමනාවටවත්, ගම්බදින් පැමිණෙන උපාධීධාරින් හට ‍රැකියාදීමට අකමැති ඉතා කුඩා කොටසක්වන කොළඹ ප්‍රභූ පෙළැන්තියටවත් ඇති උවමනාවට නොවේ.

එවැන්නන් පතුරවන මත්වාදයන්හී පැටලී සිටින විශ්ව විද්‍යාලවලින් බිහිවන්නද, සැබවින්ම රටේ සියල්ලන්ගේම උන්නතිය ගැන සිතන (අධ්‍යාපන ඇමතිතුමා කියන පරිදි වැස්සකටවත් විශ්ව විද්‍යාලයකට නොගිය) අයද, ඉතාකුඩා පිරිසකගේ උවමනාවන් මත වෙළඳ පොළ හැසිරවීමට ආණ්ඩුව පොළඹවන්නන් දෙස බලාසිටින කාලය අවසන්කළයුතුය. නව අදහස් ගලා ඒමට ඉඩදීමට සහ ප්‍රේමදාස රාමුවෙන් පිටතට ආණ්ඩුව පැන්නවීමට උත්සාහකළයුතුය. ජංගී මැසීම නවත්වා, ජංගි ගලවා දෙකට නැමෙන්නට සිදුකරන කාලයක් ගෙන එන නායකයින්ටද, අපගේ මිනිසුන්හට ඇත්තේ අග්ගලා ගුළිකිරීමේ සහ ගංජා සුරුට්‍ටු රෝල් කිරීමේ හැකියාවන් පමණක්යැයි සිතන නායකයින්ටද අතීතය මතක්කොටදී රට වෙනතකට ගෙනයාමට කාලය පැමිණ ඇත.

පින්තූර

http://www.hanwhananotech.com සහ http://www.lbl.gov/Science-Articles/Archive/sabl/2007/Nov/gap.html

ප්‍රතිචාර 12

Filed under අධ්‍යාපනය, ආර්. ප්‍රේමදාස, ආර්ථිකය, ඇඟලුම් කර්මාන්තය, කාබන් නැනෝටියුබ්ස්, ග්‍රැෆයිට්, ග්‍රැෆීන්, දේශපාලනික, මිනිරන්, විද්‍යා, විශ්ව විද්‍යාල, සංචාරක කර්මාන්තය, සමාජීය, සිංහල

විද්‍යාව අතහැර දැනුම සොයා තනිමග යන දර්ශනවාදීන්ටයි

දර්ශනවාදය මිනිසාගේ ආරම්භයතරමට පැරණියැයි සිතිය හැක. ආරම්භයේ පටන්ම දර්ශනවාදය මිනිසාත් විශ්වයත් අතර ඇති සම්බන්ධය සොයායැමට වෙරදරයි. මෙහි අතුරු ප්‍රතිඵලයක් ලෙස දේවවාදී ආගම් සහ විවිධාකාර ස්වාභාවික විද්‍යාවන් ආරම්භවිය. පැරණි දර්ශනවාදීන්වන ඇරිස්ටෝටල් සහ ප්ලේටෝ වැන්නවුන්ගෙන් විද්‍යාවට සිදුවූ සේවයද නොසලකාහැරිය නොහැක. මධ්‍යකාලීන යුගය දක්වා විද්‍යාවත් දර්ශනවාදයත් අතර එතරම් වෙනසක් නොතිබිණි.

17 වැනි සියවසේදී යුරෝපයේ පැවති සමාජය පල්ලියවිසින් බුද්ධිශෝධනය කරනලද්දක් බැවින් එහි ස්වාභිමාණය නිසා ආගම සහ විද්‍යාව අතර ආරවුල් ඇතිවිය. ප්ලේටො සහ ඇරිස්ටෝටල්ට අනුව පෘථිවිය කෙන්ද්‍රකරගත් ග්‍රහලෝක පද්ධතියක් එකල තිබු ආගම්වලට එකතුවීතිබිණි. ගැලිලියෝ විද්‍යාත්මක නිරීක්ෂණ තුළින් එය වැරදිබව වටහාගැනීම සහ සුර්‍යා කෙන්ද්‍රකරගත් ග්‍රහ මණ්ඩලයක් ඉදිර්පත්කිරීම මෙම ආරවුලේ මුලාරම්භයවේ. ආගම සමග මෙන්ම විද්‍යාව සහ දර්ශනවාදය අතර ආරවුලක ආරම්භයද තරමක්දුරට මෙයවිය හැක. එතැන්පටන් විද්‍යාවතුළ සිදුවූ වේගවත් දියුණුවනිසා විද්‍යාවත් දර්ශනවාදයත් අතර කැපීපෙනෙන වෙනස්කම් ඇතිවිණි.

දේවාගම්වාදය මෙන් නොව දර්ශනවාදයත් විද්‍යාවත් දැනුම ලබාගැනීමට තාර්කිකමය මගක් භාවිතාකරති. නමුත් මේසඳහා භාවිතාකරන ක්‍රමවේදයන් හාත්පසින්ම වෙනස්ය. දර්ශනවාදය පුද්ගලබද්ධ ආකෘතියක් භාවිතාකරමින් දැනුම සෙවීමට ප්‍රමුකතාවයක්දේ. මෙහිදී විශ්වයතුළ හා සමාජයතුළ තනිපුද්ගලයෙකුගේ වැදගත්කම උකහාදැක්වීමක් සිදුවේ. එමනිසාම දර්ශනවාදින් සහජාවබොධයෙන් ලැබෙන නිගමනයකට පැමිණ ඒය සනාථකිරීමට තර්කානුකූලව කරුණු ඉදිරිපත්කරයි. ඔවුහු බොහොවිට ලෝකය මෙසේ වියයුතුය යන මතය ඉදිරිපත්කරති.

විද්‍යාව යමක් කෙසේ වියයුතුද යන්නවෙනුවට යමක් සිදුවූයේ/සිදුවන්නේ කුමනාකාරයටද යන්න පෙන්නුම්කරදේ. ඒසඳහා විද්‍යාත්මක සාක්ෂි සහිතව කරුණු ඉදිරිපත්කරයි. නිගමනයකට පැමිණෙන්නේ පර්යේෂණාත්මක සාක්ෂි පදනම්කරගෙනය. විෂයානුබද්ධ ආකෘතියක් භාවිතාකරමින් යථාර්ථවාදී ලෝකයක විවිධාකාරදේ අතර ඇති සහසම්බන්ධතාවයන් පෙන්නුම්කරදේ. විද්‍යාව ඉතාමත් තර්කානුකූලය, ඉතාමත් පිළිවෙළකින් යුක්තය එසේම මානව ශිෂ්ටාචාරට ඉදියට ගෙනයාමට දැවැන්ත මෙහෙවරක් ඉ‍ටුකර ඇත.

අර්තානුකූල දැනුම සෙවීම සඳහාද, විද්‍යාවේ සහ දර්ශනවාදයේ දෙකෙහිම ඉදිරි පැවැත්ම සඳහාද සහජීවනයකින් කටයුතු කළයුතුවේ. දැන් සම්පූර්ණයෙන්ම වෙනස් ක්ෂේත්‍රයන් දෙකක්වන විද්‍යාවත් දර්ශනවාදයත්, අතීතයෙදී එකිනෙකාගෙන් ඉගෙනගෙන ඇත. නව විද්‍යාත්මක සොයාගැනීම්මත පදනම්වෙමින් නව දර්ශනයන් බිහිවී ඇත. පරිණාමවාදය, හයිසන්බර්ග්ගේ අවිනිශ්චිතතා මූලධර්මය එවැනි නිදසුන්ය.

ආදරය වැනි හැගීම ඇතිවන්නේ එන්ඩො‍ෆින් නමැති රසායනිකයන් නිසායැයි විද්‍යාඥයින් නොකියනමුත් එවැනි රසායනිකයින් පිටියුටරි ග්‍රන්ථිය මගින් එවැනි හැඟීම ඇතිවූ කලෙක නිකුත්වන බව කියති. එබැවින් අණු මගින් සියල්ල තේරුම් ගත නොහැකිද/හැකිද යන්න රසායන විද්‍යාඥයින් නොකියති. එනමුත් යම්දෙයක් සිදුවීමට මූලිකවන අණුවක් ඇතිනම් එය කුමක්දැයි සොයාගනිති. එසේම එම අණු කෘත්‍රිමව ශරීරයට ඇතුළුකිරීම මගින් ස්වභාවිකව ඇතිවන හැගීමට සමාන හැඟීමක් ශරිරයතුළ ඇතිකළ හැකිබව ඔවුහූ දනිති.

විද්‍යාව එතුළින් සොයාගත හැකි සියල්ල සොයා නිමකොට නැත. එබැවින් සැමවිටම විද්‍යාවේ අසම්පුර්ණතා පවති. මීට වසර 50කට පෙර සාමන්‍ය මිනිසුන්හට මහසයුරේ මැදසිට හෝ කාන්තාරයක මැදසිට දුරකථන ඇමතුමක් ලබාගැනීම හිනෙකින්වත් සිතිය නොහැක්කක්විය. නමුත් අද එය වෙනස්වී ඇත. සමහර විද්‍යාත්මක සොයාගැනීම් සඳහා පර්යේෂණ සැලසුම්කිරීම මෙන්ම ඒවා සාර්ථකව ක්‍රියාත්මකකිරීමද ඉතාමත් අපහසුබවද මෙහිදී සඳහන් කළයුතුය.

විද්‍යාව එහි ගමන ඉදිරියට ‍රැගෙන යන අතරතුර දර්ශනවාදය 18 වැනි සියවසේ සිරවී ඇත. නවීන විද්‍යාත්මක සහ තාක්ෂණික දැනුම උපයෝගී කරගනිමින් කාලීන ප්‍රශ්න විසඳීමට හෝ සිදුවිය යුත්තේමෙයයැයි කීමට අලුත් දර්ශනයක් බිහිවී නොමැත. තාමත් ධනවාදය, සමාජවාදය කරපින්නාගෙන යන දර්ශනවාදීන් සාමය සහ නිදහස පතුරුවන්නට යන්නේ සමාගම්වල සිරකූඩුවල සිටය. බදුගැන කතාකරමින් ඡන්දය ඉල්ලන හෝ ඡන්දයදෙන කී දෙනෙකු ඇඩම් ස්මිත් හෝ කාර්ල් මාක්ස් කියවා ඇත්ද? කියවා තිබුණා නම් ඔවුන්ව පහසුවෙන් ‍රැවටිය හැකිවේද? ඇති නැති පරතරය වැඩිවන ලෝකයක, බලය සහ ධනය ඇති සුළුතරයක් විසින් පාලනයවන මානසිකත්වයෙන් මිදී නව විද්‍යා සහ තාක්ෂණික දැනුම භාවිතාකර අලුත් දර්ශනයක් ගොඩ නගා එතුළින් ළොවහි ප්‍රශ්න දකින්නට කාලය පැමිණ ඇතිබව දර්ශනවාදින්හට නොපෙනෙන්නේ ඇයි? ජෝන් රෝව්ල්ස් මේ සඳහා දරාඇති උත්සාහය ඉන් ඉදිරියට ගෙනයාමට අලුත් දර්ශනවාදීන්ට හැකිවේද?

ප.ළි.: විද්‍යාවතුළින් නොව දර්ශනයතුළින්ම පමණක් විශ්වයේ සැලැස්ම තේරුම් ගැනීමට හැකිද කියා කිවූ ඇය විද්‍යාව යන වචනය කොතරම් භාවිතා කොට ඇත්ද? එහි අරමුණ කුමක්විය හැකිද? විද්‍යාවතුළින් මෙය කළනොහැකිය යනමතයකට එල්බගෙන සිටීමටවඩා විද්‍යාවෙන් ඇතිකළ ඇතිකරන නව දැනුම උපයෝගීකර ගෙන විශ්වයේ සැලැස්ම් තේරුම්ගැනීමට උත්සාහ නොකිරීමට හේතුව දර්ශනවාදීන් පටන්ගන්නේ නිගමනයට පැමිණීමෙන් පසුව නිසාම වියහැකිය.

ප්‍රතිචාර 6

Filed under අධ්‍යාපනය, ආගමික, දර්ශනවාදය, පරිණාමවාදය, රසායනික, විද්‍යා, සමාජීය, සිංහල

පරිනාමවාදය තෙරුම්ගැනීම (ආගම නොව විද්‍යාව පදනම්කරගෙන) – re-bloging again with permission

මේ ලිපිය ඉදිරියේදී වෙනස්විය හැකිබැවින් (රචකයාගේ කාලවේලා සීමිත බව නිසා ඔහු විසින් ඉදිරියේදී ලිපියට අළුතින් කරුනු අඩංගු කිරීමට බලා පොරොත්තුවේ) අලුත්ම ලිපිය බැලීමට පහත සබැඳියාවට යන්න.

http://www.secularsrilanka.com/discussions/prasad-s-rants/understanding-evolution

Understanding Evolution – Prasad

This post is a response to http://si.archaeology.lk/?p=1210 (මයෝසීන යුගයේ සිට මානව පරිණාමය)

ගවේශනය මත පදනම් නොවී, හුදෙක් ශ්‍රද්ධාව මත පිහිටා සිටිමින්, නූතන විද්‍යාවෙ ජෛව පරිණාම වාදයට (Theory of Evolution) එරෙහි වන ආගමික අන්තවාදීන් ගේ කඨොර ශබ්දය නිතර ඇසෙන මෙවන් වකවානුවක, පෘතුවියේ සහ ජීවයෙ ඉතිහාසය පිලිබඳ විද්‍යාත්මකව විස්තර කෙරෙන මෙවන් ලිපියක් (see the link above) ඉතා වැදගත් මෙහෙයක් ඉටුකරයි. ඒ ලිපියට බොහෝ තුති!

ඉහත ලිපිය ගැන මට ඇත්තෙ ඉතා සුලු ඌන පූරනයක් පමනි. එම ලිපියේ ඇති පහත සඳහන් වැකිය වෙනස් ආකාරයකට ලියවුනේ නම් ඉතා අගනේය.

/* … ඔවුන් නූතන මානවයා දක්වා පරිණාමය වූ ආකාරය…*/

ඉහත වාක්‍යයෙන් සහ ඉහත ලිපියේ අග කොටසේ ඇති සමහර වාක්‍ය වලින් ගම්‍ය විය හැකි එක් වැරදි අදහසක් නම්, ජෛව පරිණාමයෙ අවසන් අනර්ග ප්‍රතිපලය මිනිසා (homo sapiens sapiens) බවයි.

මිනිසා මෙන්ම, හැලි වඳුරාත්, ගල් ඉබ්බාත්, ගස් ගෙම්බාත්, කුම්බාලවාත්, පසැඟිල්ලාත්, ඇමීබාවාත්; අද දවසෙ අපගේ පරිසරය අප සමග බෙදා හදා ගන්නා සියලු වර්තමාන සත්වයෝත්, වසර බිලියන ගනනක පරිණාමයෙ ප්‍රතිපලවේ. මිනිසා මෙන්ම මේ සියලු සත්වයෝ තම තමන්ගේ පරිසර පද්ධති වල වර්තමාන තත්වයන්න්ට ගැලපෙන සේ මනා ලෙස හැඩ ගැසුන අංග සම්පූර්න සත්වයෝ වෙති. මිනිසා ඔවුන් අතරින් විශේෂ වන්නේනම්, ඒ මෙවා ලියන ඔබත් මමත් මිනිසුන් වීම නිසා පමනි. “අංගසම්පූර්න සතුන්” යන යෙදුමෙන් මා අදහස් කලේ, මෙම සතුන් වර්තමාන පාරිසරික තත්වවලට කදිමට ගැලපෙන බව මිස, එම සතුන් පරිණාමයවී අවසන් බවක් නොවේ. පරිණාමය යනු දැන් “අවසන්වී” ඇති දෙයක් ලෙස වැරදි අදහසක්ද වේ. මා කීමට උත්සාහකල වැදගත් දෙය නම් මිනිසා පරිණාමයේ “අග්‍ර ඵලය” සහ සෙසු සතුන් යනු පරිණාමයේ අතුරුපල ලෙස හඳුන්වන අර්ථකතනය ජෛව විද්‍යාත්මකව වැරදි බවයි. “පරිණාමිකව, සියලු සත්වයෝ එක සමානයෝය.”

එක්තරා කාල සීමාවකදි පැවතුන පරිසර තත්වයන්ට සරිලන ගුනාංග තිබුනද, කාලයෙ ඇවෑමෙන් වෙනස් වූ පරිසර සාධක සමග පැවත්මට නොහැකිවූ නිසා අප අතරින් වියෝ වූ බොහෝ සත්ත්ව විශේෂ වෙති. මෙම වාක්‍යය කියන විටම ඩයිනසෝරයන් මතක් වුවද, එතරම් ඈත කාලවල නොව, මෑත ඉතිහාසයෙ මිනිසුන් දන්නා, දැක ඇති, ෆොටො පවා ගෙන ඇති, තස්මේනියානු ව්‍යාඝ්‍රයා[1] (Tasmanian Tiger) මෙන්ම, අපි වැඩිපුර ගනන් නොගන්නා ගෙම්බන්, මාලුවන්, කෘමීන් සත්ත්ව විශේෂ දිනපතා (මෙය ලියන මොහොතේද) සදහටම වඳවී යයි. අද දවසෙ පරිසරට ගැලපෙන සතා හෙට දවසේ තත්වයන් නිසා ඊට නොගැලපීමට ඉඩ ඇත. ප්‍රශ්නය වන්නෙ අද/හෙට යනුවෙන් කියන මේ තත්ව ඇත්තටම අවුරුදු සියදහස් ගනනින් මැනීමට සිදුවන නිසා, පරිණාමය යනු අපෝහනය කලයුතු සංසිද්ධියක් මිස, කෙටි කලක් තුල නිරීක්ෂනය කල හැක්කක් නොවීමයි. එනමුත් “ස්වභාවික වරනය” (Natural selection) නම් කෙටිකලක් තුල එතරම් සංකීර්න නොවන සතුන් අරභයා නම් නිරීක්ෂනය කල හැකිය. සංකීර්න සතුන් සම්බන්දව “පරිණාමීය” වෙනස්කම් හා අලුත් සතුන් ඇතිවීමනම් (speciation)  “මේ කපේදී” නිරීක්ෂනය කල නොහැක්කකි.

පරිණාමය යනු එදත් අදත් හෙටත් දිගටම සිදුවන, ඉතා සරල සංකල්ප කිහිපයක් ඉවසීමෙන් අවබෝධ කරගත් විට, ඔනෑම කෙනෙකුට ලේසියෙන් පසක්වන, ස්වාභාවික සංසිද්දියකට ඩාවින් සහ ඔහුගෙ සංකල්පය වැඩිදියුනු කල පසුකාලීන විද්‍යාඥයන් දුන් නමක් පමනි.

අප මේ පරිණාමය ගැන ලියන කියවන මොහොතේද, අප වටා ඇති සමස්ත ජෛව පද්ධතියම, පරිණාමය වෙමින් පවතී. මෙම ක්‍රියාවලියේ අග්‍ර පලය homo sapiens sapiens නොවේ, හැලි වඳුරාත් නොවේ, ගල් ඉබ්බාත් නොවේ.

අද අප මිනිසාගෙ ‘සතෙක් වශයෙන්’ වැදගත් කම මනින මිමි අනුව ගත්කල ජෛව ඉතිහාසය තුලද අපට වඩා “හොඳ” සතුන් අඩුම වශයෙන් එකෙක් හෝ සිටි බවට සාධක ඇත. නියන්ඩ්‍රතාල් මානවයා වර්තමාන මිනිසාට වඩා ශරීර නිර්මායෙන් “හොඳ” (‘good’ is a very relative term) බවට පොසිල සාධක ඇත. මොලයෙ ප්‍රමානය ගත්කල එය වර්තමාන මිනිසාට වඩා තරමක් ලොකු බවත් පෙනේ. අවාසනාවට නියන්ඩ්‍රතාල් වරුන් සහ සේපියන් වරුන් එකම පරිසර පද්ධතියේ එකම සම්පත් පරිබෝජනය සඳහා තරඟ කල සතුන් වූහ, මෙම සටනින් සේපියන්වරු ජයගත්තේ නියන්ඩ්‍රතාල් වරුන්ට වඩා සේපියන්වරු ආක්‍රමනශීලි වු නිසා බව කියැවේ.

සඳහන් කල යුතු තවත් වැදගත් කරුනක් නම්, ආක්‍රමනශීලිත්වය, රලු පරලු බව යනු ස්වභාවික වරනයේදී විශෙෂ ධනාත්මක-හැකියාවක් ලෙස සඳහන් වීම හැමවිටම නිවැරදි නැති බවයි. ජීවියා (Oraganism) කේන්ද්‍ර කොටගත් ඩාවින් මොඩලයට වඩා සාර්ථක ලෙස පරිණාමය විස්තර කිරීමට රිචර්ඩ් ඩොව්කින්ස් (Richard Dawkins) ප්‍රමුක විද්‍යාඥයන් ප්‍රචලිත කල “ජානය” කෙන්ද්‍ර කොටගත් මොඩලයට (Gene centric model of evolution) හැකිවී ඇත. ආදරය, කරුනාව, සහජීවනය, පරාර්ථකාමය යන “මානව” ගුනාංග ස්වභාවික වරනයෙදී හොමෝ සාපියනස් වරුන් ඇතුලු තවත් බොහෝ සතුන්ට ධානාත්මකව බලපෑවෙ කෙසේද සහ එම ගුනාංග අපගේ ජානගත “හැකියාවන්” බවත් මෙහිදි විස්තර කෙරේ.

මගේ මෙම සටහන මෙතනින් අවසන් නැත. කාල වේලාව ලැබෙන විටක මෙම ලිපියට අලුතින් කරුනු එක්කිරීමට බලාපොරොත්තු වෙමි.

ප.ලි. :

[1]. Tasmanian Tiger යන්න “තස්මෙනියානු කොටියා” ලෙස නොව “තස්මෙනියානු ව්‍යාඝ්‍රයා” ලෙස පරිවර්තනය කලේ ඇයිදැයි ඔබට ප්‍රශ්නයක් නැගුනේ නම්, ඊට හෙතුව මෙතැනින් බලා දැනගන්න. -> http://en.wikipedia.org/wiki/Kotiya

[2] වත්මන් මිනිසා නියන්ඩ්‍රතාල් මානවයා ගෙන් පැවත එන බවට වැරදි අවබෝධයක් සමහර දැන උගත් පුද්ගලයන් අතර පවා තිබෙන්නේ කුමක් නිසාද යන්න ඔබට මේ ලිපිය කියැවූ පසු පසක්වූයේ නම්, මගේ ලිපියේ අරමුනු එකක් අතිසාර්ථක වී ඇත. හෝමො සේපියන්ස් ගනයේ නොවන, ආදිවාසි මානවයන් ගැන කියැවෙන විටම අපට සිතෙන්නේ “ඔය කියන්නෙ අපට පෙර සිටි පරිණාමිකව “නොදියුනු” වඳුරෙක් ගැනයි” යනුවෙනි. “හෝමො සේපියන්ස් සේපියන්ස්” යනු පරිණාමයෙ අවසන් අග්‍රඵලය බවට සිතා සිටින අහංකාර උද්දච්ඡ බව ඊට හේතුවයි. පරිණාමීය ගසේ කිසිම තැනෙක සිටි සහ සිටින සතෙක් “නොදියුනු” සතෙක් නොවේ. අද දවසෙ පරිසර තත්වයන්ට ගැලපෙන සේපියන්ස් මිනිසා මෙන්ම, ඊට පෙර සිටි මානවයන්ද එදා දවසේ පරිසර තත්වයන්ට ගැලපුන “දියුනු” සත්වයන් වූහ.

නියෙන්ඩ්‍රතාල්වරුන්ගෙන් අපි පැවතනොආවද, පරිණාමීය ගසේ නියෙන්ඩ්‍රතාල්වරුන්ට සහ අපිට පොදු මුතුන්මිතෙක් සිටි බවට සැකනැත. සේපියන්වරු සහ නියෙන්ඩ්‍රතාල්වරු යනු දේපල සඳහා ගහ මරාගත් ලඟ ඥාතීන් වේ.

ඒ දවස් වල සිටි මානවයන් පරමාණු බලාගාර නොතැනූ බව සබෑය. එක වෙනම කතාවකි. තව අවුරුදු 250,000කට පසු අලුත්ම බලශක්ති ප්‍රභවයක් සොයගන්නා ඉදිරි දවසේ මානවයන් (සේපියන්ස්ලා නොවේ), ගින්දර භාවිතය සොයාගත් මුල්ම මානවයාට අපි අද දවසෙ දක්වන සැලකිල්ලට වඩා වැඩි සලකිල්ලක් පරමාණු බලාගාර තැනූ සේපියන්ස්ලාට දෙනු ඇති. ඒ අධ්‍යාත්මිකව ඔව්න් අපට වඩ ඉදිරියෙන් සිටිනු ඇති බැවිනි.

සේපියන්වරු යනු පරිණාමීය ගසේ එක් අත්තක ඉන්නා සංකීර්නම සහ බුද්ධියෙන් වැඩි සත්වයෙක් බව සැබෑය. පරිණාමීය ඉතිහාසයෙ “රන් අකුරින්” ලියැවෙන ප්‍රථමයක් ඔවුන්ට හිමිවී ඇත. එනම් තමන් වාඩිවී සිටිනා පාරිසරික තාප්පයට තමන් විසින්ම “කෙලවාගෙන” (“කෙලියා නේද පින්වත තාප්පෙට!”) වඳවී යාමෙ හැකියාව ලැබූ ප්‍රථම සත්ව කොට්ටාශය ඔවුන් වීමයි.

මෙවා ලියන මාගෙ මේ ව්‍යායාමය, කවදා හෝ දවසක අපි තාප්පයට කෙලවා ගැනීමෙ අවදානම අඩු කිරීමෙ පරම පවිත්‍ර චෙතනාවද, නින්ද නොයැමේ රෝගයද (insomnia) මිශ්‍රවීමෙන් තැනුනකි.

සමහර අදහස් මා සොරාගත් තැන්

වැඩිදුර කියැවීම්

වැඩිදුර නොයන නොකියැවීම්

විරුද්ධ සංකල්ප ඇත… ඒවාද කියැවීම යෙහෙකි. ඉහත සඳහන් “නොකියැවීම්” වලින් පහත සඳහන් කියැවීම් වෙනස් වන්නෙ “නොකියැවීම්” වල ඇත්තෙ එල්බගත් මතාවද (Dogma) පමනක් වීමය.

Read the opposite views too when they make sense

Disclaimer:

මම රිචර්ඩ් ඩොව්කින්ස් සරන නොගියේ වෙමි! නමුත් ඔහු වෙනුවෙන් කඩේ යමි.

බොහෝ පුද්ගලයන් ආගමික වන්නේ මක් නිසාද? ජීවිතය සහ අප වටා ඇති සියල්ල ගැන අපට පැහැදිලි උත්තර නැත. විද්‍යාව මෙම කෘතිම ප්‍රශ්න වලට උත්තර නොදෙයි. විද්‍යාව යනු දැනුම සහ නොදනුම අතර මායිමෙ සිටිමින් දැනුම ගොඩ නගන එක් ක්‍රමවෙදයක් පමණි. උත්තර නැති ප්‍රශ්න මිනිසා භීතියට පත්කරයි. රෑට නින්ද නොයයි. හෙට මට වන්නෙ කුමක්ද? මගෙ අඹු දරුවන්ට නරකක් වෙයිද? මා මල පසු සොහොන් කොතේ කවුරුන් හෝ දුක් ගීයක් ලියයිද? උත්තර නැති මේ ප්‍රශ්න සමග ජීවත්වීම අසීරුය. බිය දැනෙයි. දාඩියද දමයි. කුමක් හෝ පිලිතුරක් අත්‍යාවශ්‍යයි. වැඩිය නොහිතන හෝ හිතන්නට කාලවේලා නැති අය, සරල ආගමික වත් පිලිවෙත් මගිනුත්, තරම්ක් හිතන අය ආගමික දර්ශනවාද මගිනුත් ලබා ගන්නේ මේ සැනසීමයි. තම ආගමික දර්ශනවාද විද්‍යාව සමග සසඳා කිරා බැලීමත්, විද්‍යාවෙන් ආගමික දර්ශනවාද ඔප්පු කිරීමේ උත්සාහයත්; අනෙක් අතට විද්‍යාව යනු හිස් සංකල්ප ගොඩක් බව පවසමින් තම ආගමික දර්ශනය ඔසවා තැබීමත් එකම කාසියෙ දෙපැත්ත වේ. මේ දෙකම නොදන්නාදේ පැවතීමේ භීතිය මැඩ ගැනීමට කරන දේය.

උත්තර නැති මේ ප්‍රශ්නවලට එදා පටන්ම (මානව ඉතිහාසයේ අපි දන්නා මුල සිටම) උත්තර දුන්නෙ ආගමයි. වඩාත් නිවැරදිව කියනවානම් පූජකයායි (සාධුවරයා, හාමුදුරුවො, ලෙබ්බෙ, පාස්ටර්, කපුවා, යකැදුරා, හිටි-ගමන්-ආවේස-වී-දේව-වරම්-ලබන-අල්ලපු-ගෙදර-ස්ත්‍රිය). පූජකයාගෙන් අසා, නොදන්නා ප්‍රශ්නවලට උත්තර සොයා දැනගෙන, ටීවී එක බලා, පාන් කාලක් කා නින්දට යන අහිංසක පුද්ගලයන්ගෙන් කාටවත් හිරිහැරයක් නැත. ඔවුන් සඳහා සේවය කිරීමට සාධුවරයා, හාමුදුරුවො, ලෙබ්බෙ, පාස්ටර්, කපුවා, යකැදුරා, හිටි-ගමන්-ආවේස-වී-දේව වරම්-ලබන-අල්ලපු-ගෙදර-ස්ත්‍රිය (from here onwards known as hidevage) යන සියල්ලත්; ඔවුන්ගෙ පැවත්ම සහතික කරන ආගමික ආයතනත්; මේ සමාජයේ පැවත්මට අති මහත් සේවාවක් කරයි. (ඔවුන් නොමැතිව මැරුනහම පාංසුකූලයක් දෙන්නේ, අවසන් ආලේපය කරන්නෙ, මලගිය ප්‍රානකාරයන් අප පසුපස විත් කරදර කරන විට ඒ මල පෙරේතයන්ට අවශ්‍ය අඩුම කුඩුම දී, පිරිතක් කියා, දේවාශීර්වද ලබා, මල පෙරේතයන් එලවා දමන්නේත්, විභාග පාස් වෙන්නට, රැකියාවක් ලබාගැනීමට, විවාහය ඉක්මන් කර දෙන්නට බෝධි පූජා කර දෙන්නේත් වෙන කවුද?)

සාධුවරයා, හාමුදුරුවො, ලෙබ්බෙ, පාස්ටර්, කපුවා, යකැදුරා, hidevage යන අයගෙන් නොදන්නා කරුනු අසා දැනගන්නා අහිංසක පුද්ගලයන් ගෙන් කාටවත් කරදරයක් හානියක් නැත. එනමුත් තමන් විසින් විග්‍රහකොට ආගමික දර්ශනවාද ඇසුරෙන් අලුත් දැනුම් ගොඩනගනා “ඉන්ටලෙක්චුවල්” ප්‍රබුද්ධයන් තරමක් භයානකය.

පරම සත්‍යය ඇත්තෙ මෙතැනයි. මෙන්න පොත! මෙතැන ඔක්කොම විස්තරකර ඇත. අපි මේකෙන් කොපි මෙච්චර විකුනලා ඇත. මේක දෙවියන් (වහන්සේ) විසින් කෙලින්ම ආවේසවු පුද්ගලයන් හරහා ලියවා ඇත, අපෙ ශාස්තෘවරයා විසින් වදාල; අච්චර, මෙච්චර කාලයක් මුඛ පරම්පරාගතවද, ඉන්පසු පුස්කොල පොත් පරම්පරගතවද, දැන් නවීන තාක්ෂනයෙන් මුද්‍රනය කොට, හාර්ඩ් කවර් (hardcover) වර්ශියන් එකෙන්ද ඇත! මේ විදිහෙ මාර්කටින් සහිතව පරම සත්‍යයෙ නොයෙකුත් වර්ශියන් විකිනේ.

ඩොව්කින්ස් තම ජාන කේන්ද්‍රිය පරිණාම මොඩලය හරහා අපට දෙන්නෙ පරම සත්‍යය සොයන, භීතියට පත් අපගෙ “ඉන්ටලෙක්චුවල්” මොල වලට සරිලන ඉක්මන් පිලිතුරු සමූහයකි. තමන් විසින් විග්‍රහකොට ආගමික දර්ශනවාද ඇසුරෙන් අලුත් දැනුම් ගොඩනගනා “ඉන්ටලෙක්චුවල්” ප්‍රබුද්ධයන් භායනක කතා කියති. නවීන විද්‍යාව මානව ප්‍රශ්න විසඳා නොමැති බවත්, පරිණාමවාදය පාසැල් පොතින් ඉවත් කල යුතු බවත්, මානව සංහතියට විනකරන අදහස් සහිත රාජ්‍යයන්ට ඉහලින් ගොස් පරමානු බෝම්බ දැමිය යුතු බවත්, මගීන් පිරුන ගුවන් යානා පැහැරගෙන ඒවා මිනිසුන් පිරුනු ගොඩ නැගිලි තුලට පැදවිය යුතුබවත්, මේ අදස් වලින් සමහරකි. ඩොව්කින්ගෙ මතවාද එසේ භයානක නොවේ

භයානක ආගමික දර්ශන හරහා ගොඩ නැගෙන දැනුම් (knowledge systems) සහ හර පද්ධතීන්ට (value systems) වඩා, ඩොව්කින්ස්ගෙ ජාන කේන්ද්‍රිය මොඩලය හරහා ගොඩ නැගිය හැකි නිර්-ආගමික (secular) හර පද්ධතිය මට පෙනෙන හොඳම විසඳුමයි. ඩොව්කින්ස්ගේ ජාන කේන්ද්‍රීය පරිණාම මොඩලය පුරවන හිස්තැන නම් මෙයයි. ඩොව්කින්ස් කර ඇත්තේද, සංකීර්න හේතු සමුදායක් සරල තනි හේතුවකට ඉක්මනින් ඌනනය කොට, අර ආගමික දර්ශනවාද හරහා සත්‍යය සොයන නොඉවසිලිමත්, භීතියටපත් මොලවලට ගැලපෙන reductionist approach එකක් බවත් ඔහුගෙ තර්කය ඩාවින්-මූලධර්මවාදයක් බවටත් සමහරු කරන චෝදනාවට මම (අකමැත්තෙන් නමුත්) යම්තාක් දුරට එකක වෙමි. එබැවින් මම  රිචර්ඩ් ඩොව්කින්ස් සරන නොගියේ වෙමි! නමුත් ඔහු වෙනුවෙන් කඩේ යමි. ඒ සියලු සත්වයන්ගේ හිත සුව පිනිසය. බහුජන හිතාය, බහුජන සුඛාය!

නොයෙකුත් අදහස්, ආකල්ප හා අවශ්‍යතා සහිත මිනිස් සමූහයාත්, හැලි වඳුරාත්, ගල් ඉබ්බාත්, ගස් ගෙම්බාත්, කුම්බාලවාත්, පසැඟිල්ලාත්, ඇමීබාවාත්, අපේ සිවිලිමට නැග, ශබ්ද කරමින් දඟලමින් සිට්නවාට අමතරව හිටිගමන් පහලට වැක්කෙරෙන්නට මුත්‍රා කරන, දවාලක හමුවුනේ නම් මැරෙන්නට පොල්ලකින් ගහන්නට රෑට සිතෙන (නමුත් දවාලට එහෙම ප්‍රානඝාත නොකරමි ) උගුඩුවාත් (Asian Palm Civet), නිවාඩු දවසකවත් උදේට නිවීසැනසිල්ලෙ නිදා ගැනීමට නොදී, උදේ පාන්දරම ලවුඩ් ස්පීකර් දමන, දවාලක වැඩියේ නම් තට්ටය පැලෙන්නට දෙන්න හිතෙන (දවාලට එහෙම අකුසල කර්ම නොකරමි) අපේ පංසලේ හාමුදුරුවෝත් (Sri Lankan Buddhist Monk), දවසකට හත් අට වතාවක් උපරිම ශබ්දයෙන් ලවුඩ් ස්පීකර් දමන පල්ලියේ ලෙබ්බේත් (Naturalized Middle-eastern Imam) , මග දිගට වෙට්ටු දමා කාර්යාලයට යන ගමන එපා කරවන, නමුත් රෑ කල කාර් එක කැඩී මහ පාරෙ අතරමන් වූ විට, ලඟට විත් උදව් කොට, මුදල් ගන්නෙත් නැතුව ගරාජ් එකක් කරා රැගෙන යන නාඳුනන ත්‍රී-වීල් මල්ලිලාත්; (Homo sapiens sapiens thrishawdrives).ඇතුලු මෙකී නොකී සියලු සත්වයෝ සමග ලෝකයෙ කුඩා ඉඩ බෙදා හදාගෙන ඉන්නට හැකි ක්‍රමයක් ලෙස නිර්-ආගමික හර පද්ධතිය අගයමි. මට වැරදී ඇත්නම් නොදන්නා කමට කමත්වා.

ප්‍රතිචාර 4

Filed under අධ්‍යාපනය, ආගමික, පරිණාමවාදය, විද්‍යා, සිංහල

මයෝසීන යුගයේ සිට මානව පරිණාමය (re-bloging with permission)

http://si.archaeology.lk/ අඩවියේ පලවී තිබූ කැලණිය වි.විද්‍යාලයේ පී.ජි.වයි. කාන්චන විසින් රචිත “මයෝසීන යුගයේ සිට මානව පරිණාමය” නමැති ලිපිය එම අඩවියේ අවසරය සහිතව මෙසේ නැවත බ්ලොග් කරමි. මේ ලිපියේ අඩංගු කරුණුගැන ඔබගේ අදහස් එම අඩවියේ සටහන් කල හැකිබැවින් මෙම ලිපිය සඳහා අදහස් පලකිරීම විසන්ධිකර දමමි.

මයෝසීන යුගයේ සිට මානව පරිණාමය


australopithecus afarensis
පී.ජි.වයි. කාන්චන 
විශේෂවේදී දෙවන වසර උපාධි අපේක්ෂක,
පුරාවිද්‍යා අධ්‍යයන අංශය,
කැලණිය විශ්වවිද්‍යාලය.

පෘථිවිය හා මිනිසාගේ සම්භවය පිළිබඳව නූතනය වන විට වැඩි අවධානයක් යොමු වීම ස්වාභාවික විද්‍යාඥයින්, මානව විද්‍යඥයින්, පුරාවිද්‍යඥයින් අතර පැහැදිලිව දැකගත හැකි කරුණකි. පෘථිවිය බිහිවීමත් සමඟම ජීවී ලෝකයට පදනම වැටුණු අතර, සත්ව ලෝකය නිර්මාණයත් සමඟ ඔවුන් ස්වාභාවික පරිසරයකට හුරු වූ ආකාරය සහ ඔවුන් නූතන මානවයා දක්වා පරිණාමය වූ ආකාරය වත්මනහි වැඩි අවධානයට ලක්ව ඇත. මිහිතලයේ බිහි වීමත්, ජීවින්ගේ බිහිවීම කුමන කාලයක සිදු වී ද යන්න පිළිබඳව භූඉතිහාසය තුළ විවිධ අවදි  පසු කරමින් අධ්‍යයනයකට ලක්කරන ආකාරය පෙනේ.

මානවයාගේ ආරම්භය කවරකාරයෙන්  සිදු වූයේ ද යන්න පිළිබඳව උනන්දුව ඈත අතීතයේ සිටම දක්නට ලැබේ. මෙහි ආගමික ඉගැන්වීම් ඔස්සේ මෙන්ම  භෞතිකවාදී ප‍්‍රවේශයන්ගේ නැඹුරුවක් ද දක්නට ලැබේ. මෙහි දී ආගමික මතයක් අභිබවා භෞතිකවාදීන් ඉදිරිපත් කළ මතය ඉස්මතුවෙන බවත් පෙනී යයි. පෘථිවිය ද සෑම ජීවියකුම ද ඔවුන්ගේ විකාශනය හා සම්බන්ධ  ඉතිහාසයක් හා අංග සම්පූර්ණ නිර්මාණයක් ලෙස අද පවත්නා ත්ත්වයන් සෑම කල්හිම නොපැවැති බවත් පිළිගන්නා දෙයකි. ඒ අනුව පෘථිවියේ බිහිවීම අදින් වසර  මිලියන 4,600 පෙර ද, ජීවීන්ගේ බිහිවීම අදින් වසර මිලියන 3,600 පමණ පෙර ද සිදු වූ බව දැනට අනුමාන  කරයි. මිනිසා ද අනෙක් ජීවීන් ද කාලයක් තිස්සේ පරිණාමය වීමේ ප‍්‍රතිඵලයක් ලෙස අද තිබෙන තත්වයට විකාශනය වූ බව මුලින්ම ප‍්‍රකාශ කළේ චාර්ල්ස් ඩාවින්ය. ඩාවින්ගේ මෙම චින්තනය උද්භිද විද්‍යාවෙහි, සත්ව විද්‍යාවෙහි, පුරාවිද්‍යාවෙහි, තුල්‍ය ව්‍යවච්චේදයෙහි, කායික විද්‍යාවෙහි, ගවේශණාත්මක මනෝවිද්‍යාවෙහි පවා පූර්ණ විප්ලවයක් ඇති කළේය(නෙස්තූර්හ් 1981:16). ජීවින්ගේ සම්භවය පිළිබඳව සාකච්ඡා කිරීමේදී මිහිතලය මත සිදු වූ ස්වාභාවික දේශගුණික විපර්යාසවලින් පරිභාහිරව ජීවී පරිණාමය සාකච්ඡා කිරීම අසීරුය. ජීවී ක‍්‍රීයාවලිය තුළ සිදු වූ සෑම වෙනසක් පිටුපසම යම්කිසි ස්වාභාවික ක‍්‍රියාවලියක් බැඳී පවතියි. පෘථිවියේ සහ ජීවින්ගේ සම්භවය මීට අවුරුදු මිලියන  4,600-3,600 කාලය තුළ සිදුවූවත් එය මානවයාගේ ආරම්භයත් අතර කාලීන වශයෙන් ඇත්තේ විශාල පරතරයකි. එබැවින් මිනිසා පිළිබඳව අධ්‍යයනය කිරීමේදී  මානව පරිණාමය  සීමාව තුළ විවිධ යුග සහ අවධීන් හැදෑරීම අත්‍යවශ්‍යය වෙයි. ලෝකයේ භූඉතිහාසය තුළ දැකිය හැකි ප‍්‍රධාන අවිධි හතරකි. භූ කාලසටහනට අනුව පහළින්ම පිහිටි ස්තරය ප‍්‍රාග් පොසිල යුගය (Precambrian era), ලෙසත් ඒ මත පිහිටි පාෂාණ ස්තරය සහිත යුග පිළිවලින් ආදී ජීවී යුගය (Palaeozoic), මධ්‍ය ජීවී යුගය, (Mesozoic), නූතන ජීවී යුගය  (Cenozoic) ලෙසත් හැන්වෙයි (ලගමුව 2000:54).

මෙහි දී නූතන ජීවී යුගය මානව පරිණාමය සම්බන්ධව තීරණාත්මක කාලවකවානුවකි. මිනිසාට සමාන කළ හැකි මුල්ම ජීවින්ගේ සාධක හමු වන්නේ  Cenozoic යුගය තුළ දී ය. මෙය අදින් වසර මිලියන 63 පමණ සිට ආරම්භ වී මෑතක් වන තුරුම පවතියි. ක්ෂිරපායින්ගේ යුගය ලෙස හදුන්වනු ලබන්නේ ද මෙම යුගයයි. කෙනොසොයික් යුගය තෘතීක සහ චතුර්තික ලෙස කොටස් දෙකකි. මෙහි තෘතීයික කාලවකවානුවේදී  පැලියොසීන්, ඉයොසින්, මයෝසින් ලෙස ද චාතුර්තික කාලයේදී  මයොසින්, ප්ලයියොසින්  ප්ලයිස්ටොසීන් සහ නූතන ලෙස අවධීන් කීපයක් හඳුනාගත හැකි වෙයි. මීට අවුරුදු මිලියන විසි හතරකට පෙර පැවැති මයෝසීන යුගය තුළ මිනිසුන් චිම්පන්සියන්  හා ගෝරිල්ලන් ආදිතමයන්  වූ වානරයින් අප‍්‍රිකාවේ  සහ ආසියාවේ ඇති වූහ. මෙම අවධියේදී ආදී වානරයින් බිහි වීම විශේෂ වෙයි. මීට වසර මිලියන පහකට පෙර ආරම්භ වන ප්ලයෝසීන වකවානුවේදී සාගර පරිසරය අද පවතින තත්වයට පත් විය. මිනිසුන්ට ආසන්න ජීවීන් බිහිවීම මෙම අවධියේදී කැපී පෙනේ(ලගමුව 2000:51).

කෙනොසොයික් යුගයේ චාතුර්තික අවධියේ  ”ප්ලයිස්ටොසීන” කාල වකවානුව මීට වසර මිලියන 2කට පෙර ආරම්භ විය. මේ කාලය තුළ මානවයා පහළ විම හා මිනිසා ශිෂ්ටසම්පන්න වීමට දරන උත්සාහයන්ගේ සාධක ලැබෙයි. මෙම කාලය තුළ මානවයා, පෘථිවිය හා ජීවීන් අතර අන්තර්  සම්බන්ධයක් ඇති බව පෙනේ.

මානව පරිණාමය සම්බන්ධයෙන් මයෝසීන කාල වකවානුව වැදගත් වන බව සඳහන් කළෙමු. මෙය මීට වසර මිලියන 25-5 අතර කාලයක් පැවැතුණි. මේ කාලය තුළ වියළි ස්වාභාවයක් ගත් අතර වැසි වනාන්තර ජලාධාර වැනි ප‍්‍රදේශයන්ට  පමණක් සීමා විය. වැසි වනාන්තර අඩු වූ අතර තෘණ ශාක වල වර්ධනයක් ඇති විය. කුර සහිත සතුන්ගේ විශේෂ සංඛ්‍යාව වැඩි විය. ඩ‍්‍රයපිතිකස් නම් මුල්ම මානවයා බිහි වන්නේ මයෝසීන යුගයේ අප‍්‍රිකාවේ වැසි වනාන්තර වලය. මොහු මානවයාගේ පුර්වජයකු වන අතර තුරු මුදුන්වල ජීවත් වෙමින් වනාන්තර වල සාමාන්‍ය ආකාරයට හැසිරමින් පළතුරු, කොලවර්ග, අල වර්ග සහ මල් වර්ග ආහාරයට ගැනීම ඔවුන්ගේ සිරිත විය. තුරු මුදුන් වල සිට මෘදු ආහාර ගන්නා ලදී.

මීට අවුරුදු මිලියන විස්සකට පෙර තිබූ ලෝක සිතියමත් වර්තමානක ලෝක සිතියමත් අතර විශාල  වෙනසක් දක්නට ලැබෙයි. අප‍්‍රිකාව වටා සාගරය නිර්මාණය වූ අතර එය ආසියාව සමඟ සම්බන්ධ විය. මීට අවුරුදු මිලියන 18-16 අතර අපි‍්‍රකාව හා ආසියාව එකිනෙකට සම්බන්ධ වූ අතර ඒ හරහා සතුන් නිදහසේ ආපසු පැමිනීමත්  නැවැත ගමන් කිරීමත් සිදු විය. මෙය සතුන් අතර තරඟයක් ඇති වීමටත්, සත්ව විශේෂ ගණනාවක් නිර්මාණය වීමටත්, අලූත් පරිසර පද්ධතීන් නිර්මාණය වීමටත් හේතු විය. රාමපිතිකස් බිහි වන්නේ මෙම පරිසර පද්ධතිය තුළය. මොවුන් මීට අවුරුදු මිලියන  14-18 ත් අතර කාලය තුළ  අප‍්‍රිකාවේ ආසියාවේ යුරෝපයේ පැතිර සිටි බව පාකිස්ථානයෙන් සොයා ගත් පොසීල මඟින් සාක්‍ෂි සපයයි. තුරු මුදුන් වල ජීවත් වූ වානරයින් වර්ග තුනක් වූ අතර මොවුන් අතරින් රාමපිතිකස් (Ramapithecus) කුඩාම විය. සිවපිතිකස්  (Sivapithecus) රාමපිතිකස්ට බෙහෙවින් සමාන වූ අතර  මොවුන් අතරින් විශාලම වානර විශේෂය වුයේ  ගිගන්ටොපිතිකස් (gigantopithecus) විය. බොහෝ විද්‍යාඥයින් විසින් රාමපිතෙකස් ආදි හොමිනිඞ් මානවයෙක් සේ පිළිගනී.

ලෝකය තුළ සිදු වූ දේශගුණික හා භූතල වෙනස් වීම් මත මහද්වීප එකට යා වුණි. කලාප අතර සතුන්ගේ සංක‍්‍රමණයක් වූ අතර මේ හේතුවෙන්  අප‍්‍රිකාව තුළ විලෝපීයන්ගේ වර්ධනයක් දක්නට ලැබේ. ඔස්ට‍්‍රලෝපිතිකස් බිහිවන්නේ මෙවැනි පරිසර ත්ත්වයක් තුළය. වැසි වනාන්තර අඩු වීම නිසා  ආහාර ගැනීමට ගස් වලින් බිමට බැසිමට ඔවුන්ට සිදු විය. රළු දේවල් කෑමට දත් සහ  හකු සැකැසුණු අතර  ඉක්මනින්ම විලෝපීයන්ට ගොදුරු විය. දෙපයින් නැගිටීමේ මුල් අවස්ථාව දක්නට ලැබෙන්නේ  ඔස්ට‍්‍රලෝපිතිකස්ගෙනි. මේ වන විට විද්‍යාඥයින් කර ඇති පර්යේශන වලින් ලැබී තිබෙන පොසිල වාර්තා වලට අනුව  මානව පරිණාමය ප‍්‍රධාන අවධි අවධි 4කින් සමන්විත බව මානව විද්‍යඥයින් පෙන්වා දෙයි.

  1. ඔස්ට‍්‍රලෝපිතිකස් ඇෆන්සිස් අවධිය
  2. හෝමෝ හැබිලිස් අවධිය
  3. හෝමෝ ඉරෙක්ටස්  අවධිය
  4. හෝමෝ සේපියන් අවධිය (උඩවත්ත 2004:67).

1  ඔස්ට‍්‍රලෝපිතිකස් ඇෆ්රෙන්සිස් අවධිය.
පොසිල වාර්තා අනුව  මානව ලක්‍ෂණ සහිත  මුල්ම ජීවීන් මීට අවුරුදු මිලියන  4කට පමණ පෙර  අප‍්‍රිකාවේ ජීවත් වූ බව පෙනී යයි. මානව පොසීලයක් මුල් වරට  1974 ඉතියෝපියාවේ  ”ඇෆර්” නම් ප‍්‍රදේශයේ  කරන ලද කැනීම් වලදී සොයා ගන්නා ලදී. අවුරුදු විසිපහක් පමණ වයස් වූ  ස්ත‍්‍රී මානවයකුගේ පොසීලයක්  වන මෙය “ලූසී” යනුවෙන් නම් කරණ ලදී.  මේ විශේෂයට අයත් පොසිල  ටැන්සානියාවේ “ලිටොලි”  නම් ගම්මානයෙන්ද හමු විය.

Australopithecus Afaransis මානවයාගේ තවත්   විශේෂ කිපයක් ඇති වූ බව  පොසීල සාක්‍ෂි වලින් අනාවරණය වෙයි.  මොවුන් සියල්ලම  ඔස්ට්‍රොලෝපිතෙසීනයන් ” ලෙස පොදුවේ හඳුන්වනු ලැබේ(පරිණාමය 2003:54).

Lucy
ලුසී (im.cour.of http://en.wikipedia.org/wiki)
  • ඔස්ට්‍රොලෝපිතෙසිනයින්ට  පොදු වූ ලක්‍ෂණ  කිහිපයකි.
  • උස අඩි තුන හමාරේ සිට පහ දක්වා වීම.  (මීටර් 1.07- 1. 52)  බර රාත්තල්  60-130 (කි.ග්‍රෑ. 27. 18- කි.ග්‍රෑ. 58.89 පූර්ණ දෙපා ගමන් විලාසයන්  සහ  සෘජු කාය විලාසයක් දැක්වීම.
  • හිසේ හැඩය වානරයකුගේ හැඩයට සමාන වීම.
  • කපාල ධාරිතාව 380cc-550cc  අතර වීම.
  • විශාල හනු හා  විශාල චාර්වක දත් තිබීම.
  • හිසේ පේශී හොඳින් වර්ධනය වී තිබීම.
  • ශාක භක්ශක වීම.

ඉහත ලක්‍ෂණ වලට අනුව ඔස්ට්‍රොලෝපිතෙසීනයන්ට වානරයන්ගේ මෙන් හිසක් ද  මානවයකුගේ මෙන් කඳක් ද තිබූ බව පෙනී යයි.  මොවන් අප‍්‍රිකානු සැවානා තෘණ බිම් ආශ‍්‍රිතව ජීවත් වී ඇත. මෙවැනි ස්ථානයක  දෙපයින් සිට ගැනීමට හැකි වීම නිසා ඔවුනට දුර සිටින  සතුරන් දැක ගැනීමටත්, ආහාර සොයා ගන්නටත් පහසු වන්නට ඇත (පරිණාමය 2003:58). අප‍්‍රිකානු මහද්වීපයෙන්  සොයා ගත් මෙම මුල්ම හොමිනිඞ් පවුලේ සාමාජිකයා වන්නේ “ටාවුන්ගේ බේබි” (tarwoung baby)ය.  මෙය ජොහැන්නස්බර්ග්  නගරයට සැතපුම් 200ක් පමණ නිරිත දෙසින් පිහිටි හුණු පතලකින් හමු විය. 1927 දෙසම්බර් 14 දින රේමන් ඩාට්  විසින් මෙය ටාවුන්ගේ බේබි ලෙස නම් කරන ලදී. රේමන් ඩාට් Austolopithecus Africanus ලෙස නම් කරන ලද්දේ මෙම හිස් කබලයි. 1949 පමන වන විට Austrolopithecusට අයත්  ෆොසිල තිහක් පමණ  දකුණු අප‍්‍රිකාවේ “ස්ටාර්ක් කොම්ක‍්‍රයි සහ මැකප්න්ස්ගාමී”යන ප‍්‍රදේශ වලින් සොයාගැනීමට හැකි විය(උඩවත්ත 2004:70). කැනීම් සාධක වලට අනුව  ඔස්ට‍්‍රලෝපිතිකස් විවිධ ඝන වලට බෙදා ඇත. විශාල ශරීරයක් හිමි Robustus සහ කුඩා ශරීරයක් හිමි Gracile ලෙසයි. ඒ අනුව මොවුන්ගේ කුඩා ශරීර ඔස්ට‍්‍රලෝපිතිකස් ගනයටත් විශාල ශරීර  පැරැන්ත්‍රෝපස්  ලෙසත් හඳුන්වනු ලබයි. පොදුවේ මොවුන් සියල්ල ඔස්ට‍්‍රලෝපිතිකස් ගණයට අයත් වෙයි.  උතුරු ටැන්සියාවේ “හාඩර්” නම් ප‍්‍රදේශයේ අවුරුදු මිලියන  4-3 දක්වා වූ කාලයට අයත්  ඔස්ට‍්‍රලෝපිතිකස් ඇෆ්රෙන්සිස්ට අයත් පොසිල  හමු වී ඇත. මොවුන්ගේ ලක්‍ෂණ  මයෝසීන යුගයේ ජීවත් වූ ඩ‍්‍රයිපිතිකස් සහ රාමපිතිකස්ට සමාන වෙයි. ස්ත‍්‍රීන් කුඩා වූ  අතර පුරුෂයින් ප‍්‍රමාණයෙන් විශාලය (උඩවත්ත 2004:71-72).

2 හොමෝ හැබිලිස් අවධිය
හෝමෝ හැබිලිස් අවධිය  වසර මිලියන  5 සිට 2  දක්වා ප්ලයෝසීන අවධිය තුළ බිහි විය. මානවයාගේ ක‍්‍රමික වර්ධනයේ  මූලාරම්භය ලෙස සළකන්නේ මොහුය. හෝර්මෝ හැබිලිස්ගේ සාධක  මුලින්ම සොයාගෙන ඇත්තේ ටැන්සානියාවේ  olduvai gorge නම් ස්ථානයේ කරන ලද කැණීම් වලිනි. පසු කාලයේදී  එකී පොසීල කෙන්යාව, ඉතියෝපියාව  හා දකුණු අප‍්‍රිකාව  ආදී ප‍්‍රදේශ වලින්ද සොයා ගන්නා ලදී(wood 2005:80-81). මොවුන් Austolopithecus Afransis ගෙන් පරිණාමය වී ඇතැයි සැළකේ. Homo Habilis පරිණාමය වීමේදී සිදු වී ඇති වෙනස්කම් දෙකකි. එනම් දේහයේ ප‍්‍රමාණය  වැඩි වීම සහ  කපාල ධාරිතාව වැඩි වීමයි. මොහු හෝමෝ ගණයේ ප‍්‍රථම  සාමාජිකයා විය. Homo Habilisගේ පහත ලක්‍ෂණ දක්නට ලැබේ.

  • උස මීටර්  1. 5 පමණ විය.
  • කපාල ධරිතාව 700 ජජ  පමණ විය.
  • ගාත‍්‍රා හා කඳ සෘජුව  ඇවිදීම සඳහා වඩාත්  හොඳින්  අනුවර්තනය වී තිබීම.
  • නළල හිස පසුපසට ආනතව පිහිටි අතර අධි අක්‍ෂි වැටී හොඳින් වර්ධනය වී තිබීම.
  • හස්ත කෞෂල්‍ය වැඩි වීම.
  • සර්ව භක්‍ෂක වීම(පරිණාමය 2003:59-61).

හොමෝ හැබිලිස් ජීවත් වූයේ වියළි සැවානා තෘණ බිම් වලය. මොවුන්ගේ ආහාර වූයේ  මුල් වර්ග සහ අල වර්ගය. මානව පරිණාමයේ  මුල් වරට මෙවලම් භාවිත කර ඇත්තේ  Homo Habilis එබැවින් ඔහු “හැන්ඞ් මෑන්” ලෙස ද හඳුන්වනු ලබයි. ආයුධ සඳහා ගල් පතුරු  (flakes), තැළුම් ආයුධ  (choppers) භාවිත කර ඇත. මිටියක් ලෙස යොදාගත් අත් පොරොවක් වැනි  මෙවලමක් සහ ගල් ආයුධ රාශියක් කළ කැණීම් වලින් සොයාගැනීමට පුරා විද්‍යාඥයින්ට හැකි විය(උඩවත්ත 2004:73, පරිණාමය 2003:61).

ඉතියෝපියාවේ  ඕමෝ ප‍්‍රදේශයේ සොයා ගත් පොසිල  ටැන්සානියාවේ ඔල්ඩුවායි ප‍්‍රදේශයෙන්  සොයාගත් පොසිල වලට  සමානකම් දක්වයි.  ඉතියෝපියාවේ “හර්දාර්”  සොයා ගත් පොසීල  අතර  Homo Habilisට  අයත් පොසිල හමු ව තිබේ. මේවා වසර මිලියන  03  පමණ පෙර ජීවත් වූ  මානවයන් සේ සළකණු ලබයි. Austolopithecus හා Homo Habilis එකට ජීවත් වී ඇති බව  පෙනේ. මොවුන් සමඟ  හිපපොටේමස්  ඇටසැකිළි ද  හමු වී ඇත.  මේ සියළු කරුණු අනුව දකුණු අප‍්‍රිකාවේ සහ  නැගෙනහිර අප‍්‍රිකාවේ විසූ ආදී ඔස්ට‍්‍රලොපිතිකස් මානවයින්  වසර මිලියන  2-1.5 අතර ජීවත් වූ බවත්  ඒ අතරම හෝමෝ හැබිලිස් ද  එකට ජීවත් වී ඇත( උඩවත්ත 2004:74).

03 හෝමෝ ඉරෙක්ටෙස්  අවධිය

නැගෙනහිර සහ දකුණු අප‍්‍රිකාවේ අදින් වසර මිලියන 2ක් පමණ පෙර හෝමෝ හැබිලිස්  හෙවත් පූර්ව හෝමෝට පසුව හෝමෝ ඉරෙක්ටස් බිහි විය(උඩවත්ත 2004:74). දැනට වසර මිලියන  1.5-2.5ත් අතර  කාලයේදී Homo Erectus ජීවත් වූ බවට පොසිල සාධක  සාක්‍ෂි දරයි. මොවුන් උතුරු අප‍්‍රිකාව පුරාත්, දකුණු යුරෝපයටත්, දකුණු ආසියාවේ  ඉන්දුනීසියාව දක්වාත්  පැතිර ගිය බව පෙනේ. ජාවා, චීනය හා ජර්මනිය යන රටවලින් ද  Homo Erectus පොසීල  සොයාගෙන තිබේ.  ඒ නිසා මොහු ජාවා මිනිසා හීඩල්බර්ග් මිනිසා යන නම්වලින් ලැබේ.  Homo Erectus සතු ලක්‍ෂණ කීපයකි.

  1. අස අඩි 4-6 (මීටර් 1.2 -1.8) පමණ  වීම.
  2. කපාල ධාරිතාව 850 cc-1,350 cc පමණ වීම. හොමෝ ඉරෙක්ටස්ගේ කපාල ධාරිතාව  හොමෝ  හැබිලිස්  කපාල ධාරිතාවට වඩා  වැඩිය. නමුත් නූතන  මිනිසාගේ කපාල ධරිතාවට වඩා අඩුය. එබැවින් මොහුගේ  මොළය  හෝමෝ හැබිලිස්ගේ මොලටය වඩා  විශාල අතර නූතන මිනිසාගේ මොළයට වඩා කුඩාය.
  3. ගාත‍්‍රා සහ කඳ වඩාත් පහසුවෙන් ඇවිදින්නට  සකස් වී ඇත.
  4. යටි හනුව විශාලය.
  5. නළල පිටුපසට  ආනතව පිහිටා තිබීම සහ  අධි අක්‍ෂි කූප වැටී හොඳින් වර්ධනය වී තිබීම.
  6. පළල් නාසයක් තිබීම.
  7. කුඩා නිකට කෝණයක් තිබීම.
  8. හිසේ අස්ථි නූතන මිනිසාට වඩා  ඝනකමින් යුක්ත වීම.

මොහු විසින් භාවිත කරන ලද මෙවලම් Homo Habilies භාවිත කළ  මෙවලම් වලට වඩා  සංකීර්ණ විය. තියණු මුවහත් කැපුම් තල මෙවලම් (blades)  සතුරා මරා ගැනීමට, මරාගත් සතුන් මස්කර ගැනීමට,  පතුරු,  සූරන ආයුධ (choppers, flakes, scrapers) ආදිය භාවිත කළ බව පෙනේ. Homo Erectus  ප්ලයිස්ටොසින අවධියට අයත් වෙයි. මෙය ග්ලැසියර අවධිය යනුවෙන්ද හැඳින්වෙයි. මෙම යුගයේදී ඇතිවූ උනුසුම්  විපර්යාස නිසා අන්තර් වාරණ කාලයක් පැවැතුණි. මෙය අදින් වසර 10,000 සිට වසර මිලින  1.8 දක්වා තිබී ඇත (උඩවත්ත 2004:74). අත්පොරව වැනි උපකරණ තනා ගැනීමට තරම් හැකියාවන්  Homo Erectus  හැකි විය.

ඉරෙක්ටස් මානවයා උග‍්‍ර මාංශ භක්‍ෂකයකු විය. මොවුන් දියුණු මෙවලම් භාවිතා කළ බැවින්  දක්‍ෂ දඩයම් කරුවකු විය. විශාල සතුන් දඩයම් කිරීමට  සහයෝගයක් අවශ්‍ය වූ බැවින්  මොවුන් නිශ්චිත ස්ථානයකට එනම්  ගල් ගුහාවක් හෝ විවෘත භූමියක  කණ්ඩායම් වශයෙන් සාමූහිකව ජීවත් වන්නට  ඇතැයි සැළකේ.  දැව භාවිතා කර වාසස්ථාන හදා ගත් බවද  සාක්‍ෂි ඇත. චීනයේ ලූංකුෂාන් ප‍්‍රදේශයේ පිහිටි චව්කෝඩියන්  (zhoukoudian) ගල්ගුහාවෙන් මොවුන් දඩයමින් ජීවත් වූ බවට  සාධක ඇත. පළතුරු සහ ඇට වර්ග ආහාරයට ගත් බව  චව්කෝඩියෙන් ගුහාවෙන් පළතුරු ලැබීමෙන් සනාත වේ.

මුල් වරට  ගින්දර භාවිතා කළ ජීවියා වන්නේද මොහුය. ආහාර වර්ග පුළුස්සා ගැනිම සඳහා  විශාල සතුන් මරාගැනීම සඳහා  එක් ස්ථානයකට කොටුකර තබාගැනීම සඳහා ද  මොවුන් විසින් ගින්දර භාවිත කර ඇත. එසේම Homo Erectus ආසියාවේ හා යුරෝපයේ සෞම්‍ය කළාපීය ප‍්‍රදේශ වලට පැතුරුණු බැවින් ශීත කාලයේ උනුසුම ලබාගැනීමට ගින්දර භාවිත කරන්නට ඇත. චව්කෝඩියන් ගල් ගුහාවේ  අඩි 23ක් පමණ යටින්  අළු හමු වීම නිසා ඔවුන් ගින්දර භාවිත කළ බව පිළිගැනීමට සිදු වේ. මොවුන් දැව භාවිතා කර නිවාස සකස් කර ගත් අතර  අතහැර දමන ලද වාසස්ථාන වලින් ශිලාමෙවලම් හමුවේ.මෙහි සාධක   නැගෙනහිර අප‍්‍රිකාවේ ඔලොර්ගෙසෙයිලි (olorgesailie) නම් ප‍්‍රදේශයෙන් හමු වී ඇත(පරිනාමය 2003:63). ජර්මනියේ මැන්හෙයිම්  (manheim) නගරයේ mapur ස්ථානයෙන් වසර 90,000 තරම් පැරැණි මානව අවශේෂ  රැසක් සොයාගෙන ඇත. හංගේරියාවේ වර්ටෙස්සෝල්ලෝ  (vertesszollo) නම් ස්ථානයෙන් සහ චීනයේ චව්කෝඩියන් ගල් ගුහාවේ හෝමෝ ඉරෙක්ටස්  සාධක හමු වී ඇත.

කොටියා,  දිවියා,  වලසුන්,  වැනි බළල් පවුලේ සතුන් මොවුන්ගේ ආහාර අතර විශේෂ විය.  චව්කෝඩියෙන් ගුහාවේ තිබී අලියන්, වල් ඌරන්, රයිනොසිරස්, ඔටුවන්, මීහරකුන්,  හා අශ්වයන්ගේ ඇටකටු  සොයාගෙන ඇත.  බාහිර කටුව සහිත මසුන්  ආහාර කොටස් ලෙස එකතු වී ඇත.  ඇඳුම්  භාවිත කිරීම,  කතා කිරීමේ හැකියාව, සන්නිවේදන හැකියාව,  ඔවුන් සතු වී ඇත.  භාෂාවක් ඇති වීමෙන්  කණ්ඩායමක සාමාජීකයන් අතර  මනා සන්නිවේදනයක් පවත්වාගෙන යන්නට ඇතැයි අනුමාන කළ හැකිය.

හෝමෝ ඉරෙක්ටස්  සම්පූර්ණ පොසිලයක් සොයාලෙගෙන  ඇත්තේ 1980 දශකයේ  මැද භාගයේ දී කෙන්යාවේ Lake Turkana වලදීය. මෙම පොසිලය අවුරුදු  12ක් පමණ වයැසැති පිරිමි  ළමයකුගේ යැයි විශ්වාස කෙරේ  (පරිණාමය 2003:65) හෝර්මෝ ඉරෙක්ටස්ට අයත්  පොසීල ලෝකයේ බොහෝ රටවල් වලින් සොයාගෙන ඇත. ග‍්‍රීසියේ පෙට්රාලෝ, ස්පාඤ්ඤයේ ටොර්රල්බාල්,ඇමිබෝනා,ප‍්‍රංශයේ ටෙරාඅමාටා, උතුරු අප‍්‍රිකාව, ඇල්ජීරියාව සහ  මොරොක්කෝව වැනි රටවල් වලින්ද  නැගෙනහිර අප‍්‍රිකාවේ ටැනිසානියාව, ඔල්ඩෝවායි ගෝර්ජ් ඉතියෝපියාවේ ඕමෝ සහ  අසාර් යන ප‍්‍රදේශ වලින් සොයිගෙන ඇත. මෙම සාධක වලට අනුව  හෝමෝ ඉරෙක්ටස් ඔස්ට‍්‍රලෝපිනිකඩට වඩා හෝමෝ සේපියන්ට වඩාත් සමීප බව පෙනී ගොස් ඇත(උඩවත්ත 2004:75-76).

හෝමෝ සේපියන් අවධිය
1. Homo Sepien  Nianderthalensis
මානව පරිණාමයේ ඊළඟ අවධිය ලෙස  ්‍යදපද ීැචසැබ  අවධිය සැළකේ. ප්ලයස්ටොසීන අවධිය  තුළ වූ රීස් හා වර්ම් යුගයන්හි  නියැන්ඩතාල් මානවයා  යුරෝපයට සම්ප‍්‍රාප්ත වීම සිදු වෙයි. දැනට වර්ෂ  500,000 පමණ පෙර Homo Erectus කාණ්ඩයකින් මොහු පරිණාමය වූ බව සැළකේ.  සේපියන් ආකාර කීපයක්  මේ කාලයේ ජීවත් වී ඇති බව  සාධක මඟින් තහවුරු වේ. ඉන් පළමුවැන්නා ලෙස සැළකෙන්නේ Homo Sepien  Nianderthalensis ය. මොහු Homo Sepien Nianderthalensis විශේෂය ලෙස සැළකේ. මොහු ජීවත් වූ කාලවකවානුව  ශීතලෙන් යුක්ත වීම නිසා  ශාරීරික වශයෙන්ද නියැන්ඩතාල්ගේ  ශරීරය ලොම් වලින් වැසි පැවැතුණි. අවුරුදු  35,000-75,000 කාලය අතර මොවුන් යුරෝපයේ  හා ආසියාවේ  ව්‍යාප්තව සිට ඇත. මිටි ශක්තිමත්ව වැඩුනු මානව කාණ්ඩයක් වන මොවුන්ගේ මොළය එකල ජීවත් වූ අනෙකුත් මානවයිනගේ මොළවලට වඩා විශාල විය.  පරිමාව නූතන මිනිසාගේ මොළයේ  පරිමාවට සමාන විය.

ඈත කාලයේ මුස්ටේරියන් යුගය යනුවෙන් හැඳින්වෙන ග්ලැසියර් යුගයේ  මුල් කාලයේ හෙවත් පූර්ව ශිලා  යුගයේ නියැන්ඩතාල් මානවයා ජීවත් වී ඇත. මේ යුගය පූර්ව ශිලා යුගය ලෙස හැදින්වෙයි. නියැන්ඩතාල් මානවයා යුරෝපයෙන් මැද පෙරදිගට  සංක‍්‍ර‍්‍රමණය වීම දැක ගත හැකි වන්නේ  ඉරාකයේ ලේවාන්ට්  (levant) හා උස්බෙකිස්ථානය  යන ස්ථාන වලින් අවශේෂ හමු වීමෙනි.  බෙල්ජියම,  ලිබියාව,  අප‍්‍රිකාව,  ආදි රටවලින්ද ඉරාකයේ ශනිදාර් ගල් ගුහාවේ කරන ලද කැණීම් වලින් ද  නියැන්ඩතාල් මානවයාගේ අවශේෂ සොයාගෙන ඇත.  ක‍්‍රි. ව. 1856 ජර්මනියේ නියන්ඩතාල් නිම්නයේ ඩූසල්ඩෝප් ගංගාව අසල පෙල් ඕහෝපර්  ගල් ලෙන තුළ කපාල කුහරයක් සහිත අස්ථි කිහිපයක් සොයා ගැනීමට හැකි විය.මෙම කපාල කුහරය ආදි කලීන මිනිසුන්ට වඩා විශාල විය. වැඩිහිටි නියන්ඩතාල් හිස් කබලක්  මුලින්ම සොයා ගන්නා ලද්දේ  1848 දී ස්පාඤ්ඤ ගල් ලෙනකදීය. මෙම කපාල කුහරයේ විශාලත්වය ඝණ සෙන්ටිමීටර්  1080 විය. 1926 අවුරුදු 5ක් පමණ වයසැති නියැනිඩතාල් පිරිමි ළමයතුගේ හිස් කබලක් ද සොයා ගන්නා ලදී.

නියැන්ඩතාල් මානවයා විවෘත තණ බිම් වල මෙන්ම  වනාන්තර වලද ජීවත් වූහ. නියැන්ඩතාල්  මානව අස්ථි හමු වූ බොහෝ ස්ථාන වල  සිංහ, කොටි, වලස්,  මැමත්, රයිනෝසිරස්,  වැනි සතුන්ගේ ඇටසැකිළි හමු වී ඇත.  ගල් ආයුධ මොවුන්ගේ එක් ප‍්‍රධාන ක‍්‍රියාවලියකි මොවුන්ද දඩයම් ජීවිතයක් ගත කර ඇත. මේ යුගයේ සුලභ මෙවලමක් ලෙස ගලින් නිර්මාණය කළ පතුරු ආයුධ  සූරන ආයුධ හා අත් පොරෝ ආයුධ භාවිත කළ බවට සාධක ලැබේ. මොළයේ වර්ධනයත්, සාමූහිකව වැඩ කිරීමේ හැකියාවත් , හදුනාගත් ශබ්ද අනුව කටයුතු කිරීමේ හැකියාවත්  විය. සත්ව සම් යොදාගෙන ඇඳුම් නිර්මාණය කළ අතර  මිය ගිය පුද්ගලයින් වල දැමූ බවට සාධක හමු වේ. ප‍්‍රංශයේ Bergeracහි Laferrassie නම් ස්ථානයෙන් සය දෙනෙකු වල දැමූ සොහොනක් හමු වී තිබේ.

පොසිල වලින් පෙන්වන කරුණු වලට අනුව වසර 90,000-100,000 දක්වා කාලය තුළ පරිණාමය  වෙමින් ගමන් කළ අතර  ඊට වසර 30,000-40,000  පමණ ඉහත දී මානව පරිණාම මගෙන් සමුගත් බව දැක ගත හැකිය. අප‍්‍රිකාව් හෝමෝ සේපියන් උපත ලබන විට  යුරෝපයේ ස්ථාන කීපයක  Homo Sepiens Neanderthal සිට ඇති බවට සාධක හමු වී ඇත ( උඩවත්ත. 2004:93-95, පරිණාමය 2003:65, වසුන්දරා 1999:17).

02 හෝමෝ සේපියන්ස්  සේපියන්ස්
නූතන  මානවයා හෙවත් හෝමෝ සේපියන්ස් සේපියන්ස් (Homo Sapiens Sapiens) පරිණාමය වූයේ හෝමෝ නියැන්ඩතාල්  මානවයාගෙන් නොවන බව  සැළකේ.  පොසීල සාක්‍ෂි වලට අනුව  දැනට අවුරුදු  40,000 පමණ පෙර වෙනත් හෝමෝ සේපියන් ආකාරයෙන්  Homo Sapiens Sapiens පරිණාමය වූ බව පෙනී යයි.  මුලින්ම ඇති වූ  Homo Sapiens Sapiens මානවයෝ  ක්‍රෙමැග්නන්  මානවයන් ලෙස හඳුන්වයි. නියැන්ඩතාල් මානවයා මෙළොවින් තුරන් වීමත් සමඟම  පරිණාමයට අවතීර්ණ වූ මෙම මානවයා  හැදි දැඩි ශක්තිමත් අයකු විය. මුලින්ම 1808 දීද, ඉන්පසු ක‍්‍රි.ව. 1868  ප‍්‍රංශයේ ක්‍රොමැග්නන්  ප‍්‍රාන්තයේ දී  කළ කැණිමකදී  මානව පොසිල  සොයාගන්නට විද්‍යඥයින්ට හැකි විය.  ක්‍රොමැග්නන්  (crowmagnan) ප‍්‍රාන්තයෙන් හමු වූ නිසා මෙම මානවයා  ක්‍රොමැග්නන් මානවයා ලෙස හඳුන්වනු ලබයි. නමුත් මෙහි ඇති ශරීර ලක්‍ෂණ නිසා  මොහු වෙනම විශේෂයක් නොව  හෝමෝ සේපියන් බව පැහැදිලි විය. පොසිල පර්යේෂණ වලට අනුව  අදින් වසර  40,000කට පෙර  ජීවත් වූ හෝමෝ සේපියන් මානවයාගෙන් නූතන හොර්මෝ සේපියන් සේපියන් මානවයා පරිණාමය වූ බව සැළකේ. හෝමෝ සේපියන් හා  හොමෝ නියැන්ඩතාල් එකම කාලයක ජීවත් වූ බව පෙනේ.  හොර්මෝ සේපියන්  මීට අවුරුදු 70,000 කට පෙර  ආසියාවේ හා  ඕස්ටේ‍්‍රලියාවේද  අවුරුදු  35,000කට පෙර  යුරෝපයේද  මීට අවුරුදු  15,000කට පෙර ඇමරිකාව හරහා ඇමරිකානු  මහද්වීපයට ද සේන්දු විය. මෙහිදී යුරෝපයට  ගිය හෝමෝ සේපියන්ට  නියැන්ඩතාල් මුණ ගැසිනි. හෝමෝ සේපියන් අතිශයින් තරඟකාරී පිරිසක් වූ බැවින්  නියැන්ඩතාල් විනාශ කිරීමට පෙළඹුනි. ක‍්‍රමක‍්‍රමයෙන් හෝමෝ සේපියන්  නිසා  නියැන්ඩතාල් හට පසු බසින්නට සිදු විය. අදින් වසර  25,000 කට පෙර හෝමෝ  නියැන්ඩතාල් සම්පූර්ණයෙන්ම විනාශ වන්නට හෝ  මොවුන් හෝමෝ සේපියන් සමඟ මිශ‍්‍ර වන්නට ඇත.

හොර්මෝසේපියන් මානවයින්  සංස්කෘතික වශයෙන් විශාල දියුණුවක් ලබා ගැනීමට  සමත් වූ පිරිසක් වූ අතර ඔවුන් සංචාරක දිවිය අතහැර  කෘෂිකර්මාන්තයටත් සත්ව පාලනයටත්   යොමු විය. බෝට්ටු තනා ගැනීමහි, පිහි, නියන්, හෙළිතුඩ, පොරව, ආදී මෙවලම් භාවිත කළ බවද  සාක්‍ෂි ඇත.  ගල්ගුහා තුළ චිත‍්‍ර ඇදීම,  මූර්ති නෙළීම හා  ආගම් ඇදහූ බව ද පිළිත හැකිය. මොවුන් පැලියොලිතිලක යුගය අවසන් කොට  නියොලිතික යුගයට අවතීර්ණ වූ අතර දියුණු මෙවලම්  භාවිත කරන ලදී.  නූතන මානවයා ජීවත් වන මෙම යුගය  නියොලිතිකය ලෙස හැදින්වේ. තමන්ට අවශ්‍ය ආහාර නිපදවා ගැනීමට  ඔවුන්ට හැකි විය. වැඩි අස්වැන්නක් ලබාදෙන බෝග  වගා කළ අතර  මීට අවුරුදු 15,000කට පෙර  ශාක හා සතුන් ගෘහාශි‍්‍රතකරණය කිරීමට  මොවුන් පෙළඹිණි. කෘෂිකර්මාන්තය  ජීවිකාව කරගත් මොවුන්  අස්වැන්නෙහි අතිරික්තයක් ඇති වූ  අතර එම අතිරික්තය හුවමාරු කර ගනු ලැබීය. මෙලෙස ලේඛන කලාව හා යාන්ත‍්‍රික ක‍්‍රම බිහිවිය(උඩවත්ත 2004:107-108, පරිණාමය 2003:64,67,68).  මේ ආකාරයට මානවයා ක‍්‍රමයෙන්  ස්ථාවර ජනාවාස පිහිටුවා ගනිමින්  ක‍්‍රමයෙන් ශිෂ්ට සම්පන්න වන බවක් පෙනේ.

neander-human-compහොමෝ නියෙන්ඩර්තාල් හා හොමෝ සේපියන්ස් (image Courtesy of http://historiesofthingstocome.blogspot.com)

නිගමනය

පෘථිවිය බිහි වීම, ජීවීන්ගේ  බිහි වීම  හා මානවයන්ගේ බිහි වීමත් අතර  අන්තර් කාලීන වශයෙන් ඇත්තේ  විශාල පරතරයකි. මීට අවුරුදු මිලියන  25කට පෙර සිට ආරම්භ වූ  මිනිසාගේ පරිණාමීය කි‍්‍රයාදාමය විවිධ දේශගුණික හා ස්වාභාවික විපර්යාසයන්ගේ හැලහැප්පීම්වලට නතු වීමක් පෙනේ. මෙවන් වූ ත්ත්වයන් තුළ  විවිධ අවධීන්හි මානවයා  ස්ථාවර වීමට උත්සාහ දරණු ලබයි.  මිනිසාගේ මොළයේ සිදු වූ වර්ධනයත්  සමඟ  ඔවුන් ක‍්‍රමයෙන් ශිෂ්ට සම්පන්න වූ අතර තම අවශ්‍යතාවලට සරිලන පරිදි සාර්ථක ලෙස  ස්වාභාවික පරිසරය තමන් අනසකට භාජනය කර ගනී.  මෙය නූතන ශිෂ්ටාචාරය බිහි වීමට හේතු විය.

ආශ්‍රිත ග්‍රන්ථ හා ලිපි නාමාවලිය

  • Human origin tha rainbird publishing Group Limited, 36 Park street, London.
  • Wood, B. (2005) Human evolution, oxford university press, Inc, newyork
  • Tones steve (1992) martin Roberb, pilbeam david Human evolution, Cambridge university press,
  • නෙස්තූර්හ්, එම්. (1981) මිනිසාගේ සම්භවය,  ප‍්‍රගති ප‍්‍රකාශන මන්දිරය,  මොස්කව්.
  • උඩවත්ත, ඒ. (2004) මානව පරිණාමය,   වාසනා ප‍්‍රකාශකයෝ, දන්කොටුව.
  • රත්නසූරිය, ඩබ්.ඩී., එම්.ජේ.එස්. විජයරත්න  හා ඩබ්.යූ. චන්ද්‍රසේකර (2003) පරිණාමය අධ්‍යාපන ප‍්‍රකාශණ දෙපාර්තුමේන්තුව, කොළඹ.
  • අතුකෝරල, ඩී.ආර්. (1999) ප්ලයිස්ටොසින යුගයේ මානව පරිණාමය, වසුන්දරා, පුරාවිද්‍යා අධ්‍යයනාංශය, කැලණිය විශ්ව විද්‍යාලය.
  • මනමේන්ද්‍ර-ආරච්චි, කේ., එම්. පෙතියාගොඩ, (2006) ලංකාවේ උභය ජීවීන්, වනජීවි උරුම භාරය, ‍කොළඹ.
  • Human origin tha rainbird publishing Group Limited, 36 Park street, London.
  • Wood, B. (2005) Human evolution, oxford university press, Inc, newyork
  • Tones steve (1992) martin Roberb, pilbeam david Human evolution, Cambridge university press,
  • නෙස්තූර්හ්, එම්. (1981) මිනිසාගේ සම්භවය,  ප‍්‍රගති ප‍්‍රකාශන මන්දිරය,  මොස්කව්.

අවසරය : {ඔබට අප බ්ලොගයේ පලවූ මයෝසීන යුගයේ සිට මානව පරිණාමය යන ලිපිය re-blog කිරීමට අවසරයි‍. අපගේ බ්ලොගයට ලින්ක් එකක් දෙන්නේ නම් අප එය අගය කරයි.
ඔබගේ ඊමේල් ලිපිනය අපගේ mailing list එකට දමන්න ද?
archaeology.lk team}

Link to the original article – http://si.archaeology.lk/?p=1210

ප්‍රතිචාරයක් ලබාදෙන්න

Filed under අධ්‍යාපනය, පරිණාමවාදය, විද්‍යා, සිංහල